వికారాబాద్, నాగార్జున సాగర్, యాదగిరిగుట్టలను గ్లోబల్ టూరిస్ట్ డెస్టినేషన్‌గా ప్రతిపాదించనున్న తెలంగాణ

కేంద్ర ప్రభుత్వం ప్రవేశపెట్టిన గ్లోబల్ స్టాండర్డ్ టూరిస్ట్ డెస్టినేషన్ పథకంలో తెలంగాణ రాష్ట్రం నుండి మూడు ప్రాంతాలను ప్రతిపాదించాలని రాష్ట్ర ప్రభుత్వం నిర్ణయించింది. వికారాబాద్, నాగార్జున సాగర్, యాదగిరిగుట్ట ప్రాంతాలను ఈ పథకం కింద ఎంపిక చేయించుకునేందుకు ప్రతిపాదనలు సిద్ధం చేస్తున్నట్లు అధికార వర్గాలు తెలిపాయి.

50 పర్యాటక కేంద్రాలను ప్రపంచ స్థాయి ప్రమాణాలతో అభివృద్ధి చేయాలన్న లక్ష్యంతో ఈ పథకాన్ని కేంద్రం తీసుకువచ్చింది. ఎంపికైన ప్రతి స్థలానికి గరిష్టంగా రూ.500 కోట్ల నిధులు లభిస్తాయి. ఇందులో రూ.300 కోట్లను రహదారులు, తాగునీరు, విద్యుత్, మురుగునీటి వ్యవస్థ వంటి మౌలిక సదుపాయాల అభివృద్ధికి ఉపయోగించవచ్చు. మిగిలిన నిధులను ప్రత్యేక పర్యాటక నిర్వహణ సంస్థ ఏర్పాటు, సందర్శకులకు మెరుగైన సేవలకు ఖర్చు చేయవచ్చని టూరిజం కార్పొరేషన్ ఎండీ గౌతమి తెలిపారు.

ఈ మూడు ప్రాంతాలు హైదరాబాద్‌కు సమీపంలోనే ఉన్నాయి. వికారాబాద్ సుమారు 75 కి.మీ., యాదగిరిగుట్ట 60 కి.మీ., నాగార్జున సాగర్ 155 కి.మీ. దూరంలో ఉన్నాయి. వీటికి రోడ్డు, రైలు సౌకర్యాలు మెరుగ్గా ఉండటంతోపాటు హైదరాబాద్ అంతర్జాతీయ విమానాశ్రయం వల్ల విదేశీ పర్యాటకులు కూడా సులువుగా చేరుకోవచ్చు.

అనంతగిరి కొండలు, ట్రెక్కింగ్ మార్గాలు, అటవీ ప్రాంతాలతో వికారాబాద్ ప్రకృతి ప్రియులకు ఆకర్షణీయంగా ఉంటుంది. నాగార్జున సాగర్‌లో బుద్ధవనం, జలాశయం, బౌద్ధ వారసత్వం వంటి అభివృద్ధి అవకాశాలున్నాయి. యాదగిరిగుట్ట శ్రీ లక్ష్మీ నరసింహ స్వామి క్షేత్రం భక్తులకు ప్రసిద్ధి. ఇటీవల ఒక్క రోజులో లక్ష మంది భక్తులు సందర్శించారు.

జూలైలో జరిగే జాతీయ సదస్సులో ఈ ప్రతిపాదనలను సమర్పించనున్నారు.