తెలంగాణలో 33% లోటు వర్షపాతం; విత్తనాలు నేలలోనే ఎండిపోతున్నాయి

ఈ ఏడాది వానాకాలంలో తెలంగాణ రాష్ట్రంలో 33 శాతం లోటు వర్షపాతం నమోదైంది. జూన్ 1 నుంచి జూలై 19 వరకు సాధారణ వర్షపాతం 254.3 మి.మీ ఉండగా, వాస్తవంగా 170.7 మి.మీ మాత్రమే కురిసింది. దీంతో వరి, పత్తి సాగుకు అవసరమైన తేమ లేక, విత్తనాలు నేలలోనే ఎండిపోతున్నాయి.

వాతావరణ విభాగం గణాంకాల ప్రకారం, 78 మండలాల్లో ఇప్పటివరకు ఒక్క చుక్క వర్షం కూడా పడలేదు. 462 మండలాల్లో సాధారణం కంటే తక్కువ వర్షం కొనసాగుతోంది. కేవలం 133 మండలాల్లో మాత్రమే సాధారణ స్థాయి వర్షం నమోదైంది. ములుగు జిల్లాలో ఒక్కదానిలోనే అధిక వర్షం (350 మి.మీ) కురవగా, మిగిలిన అన్ని జిల్లాల్లో లోటు ఉంది.

రాష్ట్రంలో వానాకాలం మొదలైన 50 రోజుల్లో కేవలం 24 రోజులు మాత్రమే వర్షం కురిసింది. గద్వాల జిల్లాలో అతి తక్కువగా 8 రోజులే వర్షం నమోదయ్యింది. హైదరాబాద్‌లో 19 రోజుల వర్షంతో 42% లోటు (121.8 మి.మీ vs 209.6 మి.మీ) ఏర్పడింది. జూలై నెలలో సాధారణంగా 227.4 మి.మీ వర్షం కురవాల్సి ఉండగా, 19వ తేదీ వరకు 61.5 మి.మీ మాత్రమే నమోదైంది.

గత ఏడాది ఇదే సమయంలో 204.3 మి.మీ వర్షం కురవడంతో 13% లోటు ఉండేది. ఈ ఏడాది లోటు మరింత ఎక్కువగా ఉండటంతో రైతులు పంటలపై ఆందోళన వ్యక్తం చేస్తున్నారు. ఆగస్టు, సెప్టెంబర్ నెలల్లో సాధారణ వర్షపాతం నమోదవుతుందా అని వ్యవసాయ వర్గాలు ఎదురుచూస్తున్నాయి.