తెలంగాణలో స్కూల్ బస్సుల తనిఖీలు రెండో రోజు; 160 బస్సులపై కేసులు

తెలంగాణలో స్కూల్ బస్సులపై RTA అధికారుల తనిఖీలు రెండో రోజు కొనసాగాయి. ఇవాళ్టి వరకు రాష్ట్రవ్యాప్తంగా 160 బస్సులపై వివిధ ఉల్లంఘనలకు కేసులు నమోదు చేశారు.

మొదటి రోజు నిన్న 245 బస్సులను తనిఖీ చేయగా, అందులో 60 బస్సులు ఫిట్నెస్ సర్టిఫికెట్ లేకుండా నడుపుతున్నట్లు గుర్తించి కేసులు నమోదు చేశారు. safety సర్టిఫికెట్, అగ్నిమాపక వ్యవస్థ, బస్సు ఫిట్నెస్, లైసెన్స్, కాలుష్య చెక్, డ్రైవర్ నిబంధనలు, పరిమితికి మించి విద్యార్థులను తరలించడం వంటి అంశాలపై ఈ చర్యలు తీసుకుంటున్నారు.

ఇవాళ రంగారెడ్డి (ఇబ్రహీంపట్నం), కరీంనగర్, ఆదిలాబాద్ జిల్లాలతో పాటు హైదరాబాద్, మెడ్చల్ పరిధిలో తనిఖీలు సాగాయి. వీటిలోనే ఎక్కువ స్కూల్ బస్సులు ఉన్నాయి. అదేవిధంగా వరంగల్, నిజామాబాద్ జిల్లాల్లో కూడా తనిఖీలు కొనసాగుతున్నాయి.

రాష్ట్రంలో 26,000కు పైగా స్కూల్ బస్సులు, వ్యాన్లు నమోదై ఉండగా, 24,000కు పైగా safety సర్టిఫికెట్లు తీసుకున్నారు. అయినా చాలా వాహనాలు నిబంధనలను పాటించడం లేదని అధికారులు గుర్తించారు. వ్యాన్లలో విద్యార్థులను తరలించడం, ఆటోలలో ఓవర్లోడ్ చేయడం వంటి వాటిపై కూడా చర్యలు తీసుకుంటున్నారు.

ఈ తనిఖీలు నిరంతరం కొనసాగుతాయని RTA అధికారులు హెచ్చరించారు. ప్రతి ఏడాది స్కూల్ ఫిట్నెస్ గడువు మే 15తో ముగుస్తుంది, జూన్ నుంచి తనిఖీలు ప్రారంభమవుతాయి. హెచ్చరికలు చేసినా పాఠశాల యాజమాన్యాలు పట్టించుకోవడం లేదని, లక్షల్లో ఫీజులు చెల్లించి పిల్లలను పంపుతున్న తల్లిదండ్రులకు భద్రతపై నమ్మకం లేకుండా పోతోందని వివరించారు.