నీటి కోసం మహారాష్ట్ర, కర్ణాటకతో తెలంగాణ చర్చలకు సిద్ధం

తెలంగాణలో నీటి కొరత నెలకొనడంతో రాష్ట్ర ప్రభుత్వం మహారాష్ట్ర, కర్ణాటకల నుండి నీటి విడుదల కోసం ప్రయత్నాలు ముమ్మరం చేసింది. రాష్ట్రంలోని జలాశయాల్లో నీరు తక్కువగా ఉంది. ఆశించిన స్థాయిలో వర్షాలు లేకపోవడం, ఎగువ రాష్ట్రాల్లోనూ వర్షాభావం నెలకొనడంతో ప్రాజెక్టులకు వరద జలాల రాకపై అనిశ్చితి ఏర్పడింది.

నీటి సరఫరాపై రాష్ట్ర ప్రభుత్వం దృష్టి సారించింది. ఈ వారంలోనే తెలంగాణ నీటిపారుదల శాఖ అధికారులు మహారాష్ట్ర, కర్ణాటక అధికారులతో సమావేశం కానున్నారు. ఈ సమావేశంలో కోయినా, నారాయణపూర్ వంటి ప్రాజెక్టుల నుంచి నీటిని విడుదల చేయాలని కోరనున్నట్లు సమాచారం.

ఇదిలా ఉండగా, ఈ నెల 25వ తేదీన తుంగభద్ర డ్యామ్‌లో కొత్త గేట్ల ప్రారంభోత్సవం జరగనుంది. కర్ణాటక ప్రభుత్వం ఆంధ్రప్రదేశ్, తెలంగాణ ముఖ్యమంత్రులను ఈ కార్యక్రమానికి ఆహ్వానించినట్లు సమాచారం. ఈ సందర్భంగా ఎగువ ప్రాజెక్టుల నుంచి నీటి విడుదల, వినియోగంపై ముఖ్యమంత్రి రేవంత్ రెడ్డి చర్చించే అవకాశం ఉంది. ఎగువ రాష్ట్రాలకు కొంతమేర వరద వచ్చినా అందులో కొంత నీరు తమకు ఇవ్వాలని రాష్ట్ర ప్రభుత్వం కోరే అవకాశం ఉంది.