ఆగస్టు 15న తెలంగాణలో స్మార్ట్ రేషన్ కార్డుల పంపిణీ ప్రారంభం

తెలంగాణ ప్రభుత్వం ఆగస్ట్ 15 నుంచి స్మార్ట్ రేషన్ కార్డుల పంపిణీ ప్రారంభించనుంది. స్వాతంత్య్ర దినోత్సవం సందర్భంగా ముఖ్యమంత్రి రేవంత్ రెడ్డి సంగారెడ్డి జిల్లా కేంద్రంలో మధ్యాహ్నం 2 గంటలకు రాష్ట్ర స్థాయి కార్యక్రమాన్ని ప్రారంభిస్తారు. అదే సమయంలో మిగిలిన 32 జిల్లా కేంద్రాల్లోనూ స్మార్ట్ రేషన్ కార్డుల పంపిణీ కార్యక్రమాలు జరుగుతాయి.

ప్రభుత్వం ఇప్పటివరకు 16.32 లక్షల కొత్త రేషన్ కార్డులు మంజూరు చేసింది. మరో 61.09 లక్షల మంది ఆహార భద్రత పరిధిలోకి వచ్చారు. దీంతో రాష్ట్రంలో మొత్తం రేషన్ కార్డుల సంఖ్య 1.05 కోట్లకు చేరుకుంది. ఈ కార్డుల ద్వారా 3.42 కోట్ల మంది ప్రజలకు ఆహార భద్రత లభిస్తుంది. ప్రస్తుతం రేషన్ కార్డు దారులకు ప్రతి నెలా 2.16 లక్షల మెట్రిక్ టన్నుల సన్న బియ్యం పంపిణీ చేస్తున్నారు.

ప్రజా పంపిణీ వ్యవస్థలో పారదర్శకత పెంచేందుకు ట్యాంపర్ ప్రూఫ్ స్మార్ట్ కార్డులు తయారు చేశారు. పంపిణీ బాధ్యతలను జిల్లా కలెక్టర్లకు అప్పగించారు. పౌర సరఫరాలు, రెవెన్యూ, పోలీసు శాఖలతో సమన్వయం చేసుకొని పంపిణీని సజావుగా నిర్వహించాలని ఆదేశాలు ఇచ్చారు. జిల్లాల వారీగా లబ్ధిదారుల జాబితాను తయారు చేసి పూర్తిగా పరిశీలించాలని సూచించారు.

లామినేటెడ్ స్మార్ట్ కార్డులను సురక్షితంగా నిల్వ చేసి, రవాణా చేసి పంపిణీ కేంద్రాలకు సకాలంలో చేర్చాలని కూడా ప్రభుత్వం స్పష్టం చేసింది. పంపిణీ కార్యక్రమానికి ఎంపీలు, ఎమ్మెల్యేలు, ఎమ్మెల్సీలు, స్థానిక ప్రజాప్రతినిధులను అధికారికంగా ఆహ్వానించాలని, వృద్ధులు, దివ్యాంగుల కోసం ప్రత్యేక క్యూలను ఏర్పాటు చేయాలని ఆదేశించారు. లబ్ధిదారులకు సమస్యలు వస్తే పరిష్కరించేందుకు ప్రత్యేక గ్రీవెన్స్ సెల్ ఏర్పాటు చేస్తారు.

పంపిణీ పురోగతిని ప్రతిరోజు పర్యవేక్షించి రోజువారీ నివేదికలను పౌర సరఫరాల శాఖ కమిషనర్‌కు పంపాలని కలెక్టర్లకు సూచించారు. ఈ మొత్తం ప్రక్రియను పర్యవేక్షించేందుకు సీనియర్ అధికారులను నోడల్ అధికారులుగా నియమించారు. స్మార్ట్ రేషన్ కార్డుల పంపిణీని ప్రభుత్వ ప్రాధాన్యత కార్యక్రమంగా చేపట్టాలని సీఎస్ సంజయ్ జాజు అన్ని జిల్లాల కలెక్టర్లకు సర్క్యులర్ జారీ చేశారు.