తెలంగాణలో 1.05 కోట్ల కుటుంబాలకు QR కోడ్ స్మార్ట్ రేషన్ కార్డులు - ఆగస్టులో పంపిణీ

తెలంగాణ ప్రభుత్వం 1.05 కోట్లకు పైగా కుటుంబాలకు స్మార్ట్ రేషన్ కార్డుల పంపిణీకి సిద్ధమైంది. పౌర సరఫరాల శాఖ ఈ కార్డుల ముద్రణ పూర్తి చేసి వాటిని జిల్లాలకు చేరవేసింది.

కార్డుల పంపిణీ తేదీని ముఖ్యమంత్రి రేవంత్ రెడ్డి నిర్ణయించనున్నారు. ఆ తేదీ తర్వాత ఆగస్టులో పంపిణీ మొదలవుతుందని అధికారులు తెలిపారు. ఆగస్టులో మూడు నెలల రేషన్ ఇవ్వడంతో నాలుగైదు రోజుల ముందుగానే కార్డులు ఇచ్చే ప్రణాళిక ఉంది.

స్మార్ట్ కార్డులు క్రెడిట్/డెబిట్ కార్డు సైజులో PVC మెటీరియల్‌తో తయారైనాయి. కార్డుపై కార్డు యజమాని ఫొటో, పేరు, చిరునామా ఉంటాయి. సీఎం రేవంత్ రెడ్డి, పౌర సరఫరాల శాఖ మంత్రి ఉత్తం కుమార్ రెడ్డి ఫోటోలు కూడా ముద్రించారు. ప్రతి కార్డుకు QR కోడ్ ఉండి, స్కాన్ చేస్తే కుటుంబ సభ్యుల వివరాలు, ఇప్పటివరకు తీసుకున్న బియ్యం, గోధుమ, చక్కెర లాంటి రేషన్ సరుకుల చరిత్ర కనిపిస్తాయి.

గ్రేటర్ హైదరాబాద్‌లో సీఎం రేవంత్ రెడ్డి ప్రారంభించనున్న ఈ పంపిణీని, 119 నియోజకవర్గాల్లో స్థానిక ఎమ్మెల్యేలు, ఎమ్మెల్సీలు, ఎంపీలు చేపడతారు. క్యూఆర్ కోడ్ వల్ల నకిలీ కార్డులకు అడ్డుకట్ట పడుతుందని, రేషన్ దుకాణాల్లో వచ్చే తప్పుడు నమోదు ఫిర్యాదులు తొలగిపోతాయని అధికారులు చెప్పారు. గతంలో వేలిముద్రల స్కానింగ్‌లో ఇబ్బందులు ఎదురైన నేపథ్యంలో క్యూఆర్ కోడ్ ద్వారా సులభంగా రేషన్ పంపిణీ జరుగుతుంది.

భవిష్యత్తులో ఈ కార్డును వివిధ సంక్షేమ పథకాలకు అనుసంధానం చేసి, ఒకే కార్డుతో పలు ప్రయోజనాలు కల్పించాలనేది ప్రభుత్వ లక్ష్యమని అధికారులు వివరించారు.