ఆహార, ఔషధ కల్తీ నియంత్రణకు ప్రత్యేక టాస్క్ ఫోర్స్ ఏర్పాటు ప్రతిపాదన

తెలంగాణ ప్రభుత్వం ఆహారం, ఔషధాల కల్తీ నియంత్రణ కోసం ప్రత్యేక టాస్క్ ఫోర్స్ ఏర్పాటు చేయనుంది. క్యాన్సర్ కేసులను తగ్గించడం ప్రధాన లక్ష్యంగా ఈ విభాగం పనిచేస్తుంది. నెలకు 4,000 నమూనాలను విశ్లేషించేలా ప్రణాళిక రూపొందించారు.

ఈ టాస్క్ ఫోర్స్ పై IPS అవినాష్ మహంతికి పర్యవేక్షణ బాధ్యతలు అప్పగించే అవకాశం ఉంది. మూడు పేర్లు పరిశీలనలో ఉన్నాయి. డ్రగ్ కంట్రోల్ అడ్మినిస్ట్రేషన్, ఫుడ్ సేఫ్టీ వింగ్ వంటి విభాగాలను ఒకే గొడుగు కిందకు తీసుకువచ్చే ప్రతిపాదనలు ప్రభుత్వం ఆమోదం కోసం పంపారు.

ప్రతిపాదనల ప్రకారం, దాదాపు 1,500 మంది సిబ్బంది అవసరం. వీరిలో 150 మందిని పోలీసు శాఖ నుంచి కేటాయిస్తారు. గ్రేహౌన్స్, ఆక్టోపస్, స్పెషల్ ఇంటెలిజెన్స్ బ్రాంచ్ నుంచి ఇటీవల ఉపసంహరించిన సిబ్బందిని ఈ విభాగంలో నియమించే అవకాశం ఉంది.

ప్రస్తుతం హైదరాబాద్, సైబరాబాద్, మల్కాజగిరి కమిషనరేట్ల పరిధిలో ప్రాధాన్యతగా తనిఖీలు జరపనున్నారు. ఈ ప్రాంతంలో 1.25 లక్షల రిజిస్టర్డ్ ఆహారశాలలు ఉన్నాయి. చిన్న హోటళ్లు, వీధి వ్యాపారుల ఫుడ్ ఔట్‌లెట్లలో జంతు కళేబరాల కొవ్వులు, కల్తీ పాలు, పన్నీర్ వంటివి తరచూ బయటపడుతున్నాయి.

నాచారంలోని స్టేట్ ఫుడ్ ల్యాబొరేటరీలో ప్రస్తుతం నెలకు 2,000 నమూనాలను మాత్రమే పరీక్షించగల సామర్థ్యం ఉంది. 33 జిల్లాల నుంచి వచ్చే నమూనాలతో తీవ్ర ఒత్తిడి ఉంది. ఈ సామర్థ్యాన్ని 4,000కు పెంచాలని ప్రతిపాదించారు. నమూనాల సేకరణ, విశ్లేషణకు తగిన వాహనాలు, పరికరాలు, రసాయనాలు అవసరమని అధికారులు సూచించారు.