2047 నాటికి తెలంగాణ GDP 10% లక్ష్యం: సీఎం రేవంత్ రెడ్డి

ముఖ్యమంత్రి రేవంత్ రెడ్డి గురువారం మహబూబ్‌నగర్ జిల్లా పర్యటనలో 2047 నాటికి తెలంగాణ దేశ GDP లో 10 శాతం అందించడమే లక్ష్యమని ప్రకటించారు. ప్రస్తుతం దేశ జనాభాలో 2.5 శాతం ఉన్న రాష్ట్రం 5 శాతం GDP అందిస్తోందని ఆయన వివరించారు.

దివిటిపల్లిలో అమరరాజా బ్యాటరీస్ సంస్థ సెల్ తయారీ కేంద్రాన్ని ప్రారంభించిన అనంతరం ఆయన ఈ వ్యాఖ్యలు చేశారు. అమరరాజా స్థానిక ప్రతిభతో కూడిన గ్లోబల్ కంపెనీ అని, రాష్ట్రంలో ఇటువంటి పరిశ్రమ రావడం మంచి పరిణామమని సీఎం పేర్కొన్నారు.

పాలమూరు జిల్లాను ఆదర్శవంతమైన జిల్లాగా అభివృద్ధి చేస్తామని, వ్యవసాయ పరిశ్రమలకు కేంద్రంగా మారుస్తామని ఆయన తెలిపారు. పాలమూరు ఎత్తిపోతల ప్రాజెక్టుకు కేంద్రం నుంచి త్వరలో అనుమతులు సాధిస్తామని చెప్పారు.

వనపర్తి జిల్లా కొత్తకోటలో బాలికల ఉన్నత పాఠశాల నూతన భవనం ప్రారంభించిన సీఎం, విద్యార్థులతో ముఖాముఖి నిర్వహించారు. గత ప్రభుత్వాల నిర్లక్ష్యం వల్ల ప్రభుత్వ బడుల్లో సదుపాయాలు లోపించాయని, కార్పొరేట్ సంస్థలతో పోటీపడేలా ప్రభుత్వ పాఠశాలలను తీర్చిదిద్దుతామని హామీ ఇచ్చారు.

విద్యా రంగంపై ఏడాదికి 30 వేల కోట్ల రూపాయలు ఖర్చు చేస్తున్నామని, ఒక్కో విద్యార్థిపై లక్షా 8 వేల రూపాయలు ఖర్చు అవుతున్నదని సీఎం తెలిపారు. 10 ఏళ్లుగా పెండింగ్‌లో ఉన్న టీచర్ల సమస్యలను కూడా పరిష్కరించామన్నారు. మాజీ ముఖ్యమంత్రులు చంద్రబాబు నాయుడు, వైఎస్ రాజశేఖర రెడ్డి, కేసీఆర్ లు అమలు చేసిన విధానాలను కొనసాగిస్తూనే, మరింత మెరుగైన పాలసీలను ప్రవేశపెడుతున్నామని ఆయన వివరించారు.