టీచర్ల సద్దుబాటు ప్రణాళిక: పాఠశాలల మూసివేతపై ఉపాధ్యాయ సంఘాల ఆందోళన

తెలంగాణ ప్రభుత్వం టీచర్ల సద్దుబాటు (రేషనలైజేషన్) ప్రణాళికను అమలుచేస్తోంది. రాష్ట్ర పాఠశాల విద్యాశాఖ జూన్ 20 నాటికి విద్యార్థుల ఎన్రోల్మెంట్ లెక్కలను పరిశీలించి, మిగులు టీచర్లను గుర్తించాలని ఆదేశాలు జారీ చేసింది. ఆ తేదీలోగా నమోదైన విద్యార్థుల సంఖ్య ఆధారంగా అదనపు టీచర్లను ఇతర పాఠశాలలకు కేటాయించాలని సర్క్యులర్లు విడుదల చేసింది.

ముఖ్యమంత్రి రేవంత్ రెడ్డి (ఆయనే విద్యాశాఖ మంత్రిగా ఉన్నారు) ఇటీవల మాట్లాడుతూ, 27,000 ప్రభుత్వ పాఠశాలల్లో సుమారు 23,000 పాఠశాలలు మూసివేసే అవకాశం ఉందని, 4,000 పాఠశాలలను మాత్రమే కొనసాగిస్తామని చెప్పారు. చిన్న పాఠశాలలను సమీపంలోని పెద్ద బడుల్లో విలీనం చేసి, విద్యార్థులకు రవాణా సౌకర్యం కల్పిస్తే విద్యా ప్రమాణాలు మెరుగుపడతాయని ఆయన వివరించారు.

అయితే, ఈ ప్రతిపాదనపై ఉపాధ్యాయ సంఘాలు తీవ్ర ఆందోళన వ్యక్తం చేస్తున్నాయి. జూన్ 20 తేదీని కటాఫ్ గా నిర్ణయించడం సమంజసం కాదని వాదిస్తున్నారు. అడ్మిషన్లు సెప్టెంబర్ 30 వరకు జరుగుతుండగా, లెక్కలు తీసుకోవడాన్ని ప్రశ్నిస్తున్నారు. అంతేకాక, ఒకటి నుంచి ఐదు తరగతుల్లో 18 సబ్జెక్టులు ఉంటాయని, టీచర్ల సంఖ్య తగ్గిస్తే విద్యా నాణ్యత దెబ్బతింటుందని హెచ్చరిస్తున్నారు.

గ్రామాల్లో పాఠశాలలు మూసివేతతో గ్రామీణ సంస్కృతికి విఘాతం కలుగుతుందని టీచర్ సంఘాల నేతలు ఆందోళన వ్యక్తం చేస్తున్నారు. ప్రస్తుతం రాష్ట్రవ్యాప్తంగా 10 వేలకు పైగా జీరో ఎన్రోల్మెంట్ బడులు ఉన్నాయని, ఇప్పటికే 1,400 పైచిలుకు పాఠశాలలు మూసివేశారని గుర్తుచేస్తున్నారు. నెలకు 500-600 మంది టీచర్లు రిటైర్ అవుతున్నారని, వారి స్థానాలను వెంటనే భర్తీ చేయకపోవడం వల్ల ప్రభుత్వ పాఠశాలలపై ప్రజల నమ్మకం సన్నగిల్లుతోందని పేర్కొంటున్నారు.

విద్యాశాఖ మంత్రిగా సీఎం స్వయంగా ఉండడంతో తమ సమస్యలు చెప్పుకోవడానికి అవకాశం లేదని ఉపాధ్యాయ సంఘాలు వాపోతున్నాయి. టీచర్ల సద్దుబాటు ప్రక్రియను వెంటనే వాయిదా వేయాలని, జూలై 31 తర్వాతే ఈ చర్య చేపట్టాలని డిమాండ్ చేస్తున్నారు. విద్యా శాఖ జారీ చేసిన ఉత్తర్వులను సవరించి, మరింత సమగ్ర విధానాన్ని రూపొందించాలని కోరుతున్నారు.

ఈ విషయంపై ప్రభుత్వం నుంచి ఇంకా అధికారిక స్పందన లేదు. పాఠశాలల సంఖ్య తగ్గింపు, టీచర్ల సద్దుబాటు తదితర అంశాలపై సమగ్ర ప్రకటన రావాల్సి ఉంది.