డబ్బులు చెల్లించొద్దు, ఆన్లైన్లో లైసెన్స్ కోసం దరఖాస్తు చేసుకోండి: RTA అధికారి

తెలంగాణ రవాణా శాఖ ఆర్టీఏ కార్యాలయాల్లో ఏజెంట్ల దందాపై కఠిన చర్యలు చేపట్టింది. రాష్ట్ర వ్యాప్తంగా రహస్య విచారణలు, ఆకస్మిక తనిఖీలు నిర్వహించాలని అధికారులు ఆదేశించారు.

స్లాట్ బుకింగ్ సమస్యలు, ఆర్సీ, డీఎల్ జారీలో జాప్యం కారణంగా ప్రజలు ఏజెంట్లను ఆశ్రయిస్తున్నారు. సారథి, వాహన్ వంటి ఆన్లైన్ సేవలు అందుబాటులో ఉన్నప్పటికీ, నేరుగా పనులు పూర్తి కావడం కష్టంగా ఉందని వాహనదారులు చెబుతున్నారు.

రాష్ట్రవ్యాప్తంగా 33 జిల్లాల్లో 62కి పైగా రవాణా కార్యాలయాలు ఉన్నాయి. హైదరాబాద్‌లోని ఖైరతాబాద్, మలక్పేట్, బండ్లగూడ, కొండాపూర్, తిరుమలగిరి, ఉప్పల్, మేడ్చల్, నాగోల్ ప్రాంతాల్లో రహస్య విచారణలు చేపట్టాలని, ఏజెంట్లను తొలగించాలని అధికారులు సూచించారు.

వాహన యజమాని ఒకరు మాట్లాడుతూ, యజమాని మార్పిడి ప్రక్రియ కోసం ఆన్లైన్లో స్లాట్ బుక్ చేసినా, ఏజెంట్ సాయం లేకుండా పూర్తి చేయడం కష్టంగా ఉందన్నారు. కార్యాలయాల్లో నేరుగా వెళితే పేపర్లు అడుగుతూ ఇబ్బంది పెడతారని, అందుకే ఏజెంట్లకు డబ్బులు చెల్లించి పని చేయించుకున్నామని తెలిపారు.

రవాణా శాఖ అధికారి చంద్రశేఖర్ గౌడ్ మాట్లాడుతూ, ప్రజలు ఏజెంట్లకు డబ్బులు చెల్లించకుండా నేరుగా ఆన్లైన్ ద్వారా లైసెన్స్, ఆర్సీల కోసం దరఖాస్తు చేసుకోవాలని సూచించారు. రవాణా కార్యాలయాల్లో ఏజెంట్లను అనుమతించబోమని బోర్డులు కూడా ఏర్పాటు చేశామన్నారు.