తెలంగాణలో ఇవాళ భారీ వర్షాలు: పలు జిల్లాలకు ఎల్లో అలర్ట్

హైదరాబాద్ వాతావరణ కేంద్రం తెలంగాణలోని పలు జిల్లాలకు ఇవాళ ఎల్లో అలర్ట్ జారీ చేసింది. రాష్ట్రంలోని హైదరాబాద్, కామారెడ్డి, మేడ్చల్, మల్కాజిగిరి, మెదక్ జిల్లాల్లో తేలికపాటి నుంచి మోస్తరు వర్షాలు కురిసే అవకాశం ఉందని అధికారులు తెలిపారు.

ములుగు, నల్గొండ, నారాయణపేట, సంగారెడ్డి, సూర్యాపేట, యాదాద్రి భువనగిరి జిల్లాల్లో ఉరుములు, మెరుపులతో కూడిన భారీ వర్షాలు పడే సూచనలు ఉన్నాయి. వీటితో పాటు గంటకు 30 నుంచి 40 కిలోమీటర్ల వేగంతో ఈదురు గాలులు వీచే అవకాశం ఉందని వాతావరణ శాఖ పేర్కొంది.

ప్రజలు అప్రమత్తంగా ఉండాలని, వాహనదారులు విద్యుత్ స్తంభాలు, చెట్ల కింద నిలబడకూడదని అధికారులు సూచించారు. రైతులు తమ పంటల విషయంలో తగు జాగ్రత్తలు తీసుకోవాలని కూడా సూచించారు.