తెలుగు రాష్ట్రాల్లో తీవ్ర వడగాలులు — 45°C దాటే అవకాశం, రెడ్ అలర్ట్ జారీ

తెలంగాణ, ఆంధ్రప్రదేశ్‌లో తీవ్రమైన వడగాలులు వీస్తున్నాయి. పలు జిల్లాల్లో ఉష్ణోగ్రతలు 42 నుంచి 44°C వరకు నమోదవుతున్నాయి. మే 20 నుంచి 24 వరకు ఉష్ణోగ్రతలు మరింత పెరిగి 45°C నుంచి 48°C దాటే అవకాశం ఉందని IMD హెచ్చరించింది.

తెలంగాణలో కొమరం భీం, ఆదిలాబాద్, నిర్మల్, జగిత్యాల, మంచిర్యాల జిల్లాలకు రెడ్ అలర్ట్ జారీ చేశారు. మరో 16 జిల్లాలకు orange అలర్ట్ ఇచ్చారు. నిజామాబాద్ జిల్లా గోపనపల్లిలో అత్యధికంగా 44.5°C నమోదైంది. జగిత్యాల జిల్లా కోల్వాయిలో 44.4°C, కామారెడ్డి జిల్లా బిచ్కుందలో 44.2°C, సిద్దిపేట జిల్లా సముద్రాలలో 44°C నమోదయ్యాయి.

ఆంధ్రప్రదేశ్‌లో 14 జిల్లాల్లో 65 మండలాల్లో 40°C కంటే ఎక్కువ ఉష్ణోగ్రత రికార్డైంది. ప్రకాశం జిల్లా కొప్పెరపాడులో 43.8°C నమోదైంది. మార్కాపురం జిల్లా కంభంలో 43.3°C నమోదైంది. నెల్లూరు, కర్నూలు, నంద్యాల, అనంతపురం జిల్లాల్లో తీవ్రమైన ఎండలు ఉంటాయని AP విపత్తు నిర్వహణ సంస్థ తెలిపింది. మంగళవారం 84 మండలాల్లో తీవ్ర వడగాలులు వీచే అవకాశం ఉందని హెచ్చరించింది.

ఉదయం 10:30 నుంచి సాయంత్రం 4 గంటల వరకు అత్యవసరమైతే తప్ప బయటికి రావద్దని వాతావరణ శాఖ సూచించింది. వృద్ధులు, పిల్లలు, గర్భిణీలు ఈ సమయంలో ఖచ్చితంగా బయటికి రావద్దని వైద్య నిపుణులు తెలిపారు. BP, షుగర్, గుండె జబ్బులు ఉన్నవారు ఎండలో తిరగవద్దని హెచ్చరించారు.

వడదెబ్బ సోకితే శరీర ఉష్ణోగ్రత 104°F దాటడం, అయోమయం, వాంతులు, తలనొప్పి వంటి లక్షణాలు కనిపిస్తాయి. వడదెబ్బ మెదడు, గుండె, కిడ్నీలపై తీవ్ర ప్రభావం చూపుతుందని వైద్యులు తెలిపారు. National Crime Records Bureau నివేదిక ప్రకారం 2022లో దేశంలో 730 మంది వడదెబ్బతో మరణించారు. 2025లో ఇప్పటి వరకు 84 మంది వడదెబ్బతో చనిపోయారు.

నీరు, ORS, మజ్జిగ, నిమ్మరసం తరచూ తాగాలని నిపుణులు సూచించారు. రోజుకు కనీసం 4 నుంచి 6 లీటర్ల నీళ్లు తాగాలి. టోపీ, గొడుగు వాడటం, నూలు దుస్తులు ధరించడం అవసరమని చెప్పారు. మద్యం, cool drinks తాగొద్దని హెచ్చరించారు.

నైరుతి ఋతుపవనాలు సాధారణంగా జూన్ 1న కేరళలో ప్రవేశిస్తాయి. ఈ ఏడాది మే 26 నాటికే కేరళను తాకే అవకాశం ఉందని IMD తెలిపింది. ఋతుపవనాలు వచ్చిన తర్వాత ఉష్ణోగ్రతలు క్రమంగా తగ్గుతాయని వాతావరణ శాఖ పేర్కొంది.