నెల్లూరులో తెలుగు అనువాద కార్యశాల; ప్రత్యేక విశ్వవిద్యాలయం డిమాండ్

నెల్లూరు జిల్లా వెంకటాచలం మండలంలోని ప్రాచీన తెలుగు విశిష్ట అధ్యయన కేంద్రంలో రెండు రోజుల పాటు తెలుగు అనువాద సంప్రదాయంపై కార్యశాల నిర్వహించారు. కేంద్రం సంచాలకులు ఆచార్య మాడభూషి సంపత్ కుమార్ అధ్యక్షతన జరిగిన ఈ సదస్సుకు పలు రాష్ట్రాల రచయితలు, కవులు, తెలుగు భాషా అభిమానులు హాజరయ్యారు.

ఈ సందర్భంగా తెలుగు నుంచి ఆంగ్లంలోకి అనువదించిన భాస్కర శతకాన్ని ఆవిష్కరించారు. భారతీయ సంప్రదాయ విజ్ఞానం బహుభాషా వ్యాప్తం కావాలని, నూతన విద్యా విధానం భారతీయ భాషల సుసంపన్నతకు దోహదం చేస్తుందని వక్తలు అభిప్రాయపడ్డారు. మహాభారతం, రామాయణం వంటి ప్రాచీన గ్రంథాలకు వందలాది అనువాదాలు వచ్చాయని, అనువాద సంప్రదాయం నన్నయ నుంచి ప్రారంభమై కొనసాగుతోందని వివరించారు.

అనువాదాన్ని ప్రోత్సహించేందుకు ప్రత్యేక అనువాద విశ్వవిద్యాలయం ఏర్పాటు చేయాలని డిమాండ్ చేశారు. ఆంధ్రప్రదేశ్ లేదా తెలంగాణలో అనువాద అకాడమీని ఏర్పాటు చేయాల్సిన అవసరం ఉందని సూచించారు. భావి తరాల విద్యార్థులకు సరళమైన భాషలో సాహిత్యాన్ని అందించడం ద్వారా భాషా సమైక్యత సాధించవచ్చునని పాల్గొన్నవారు తెలిపారు. అనువాదం కేవలం భాష మార్పు కాకుండా సంస్కృతి, సంప్రదాయాల వినిమయం అని చర్చించారు.