మూసీ రివర్ ఫ్రంట్ ప్రాజెక్టుపై వాలంతరి వద్ద ఉద్రిక్తత: బాధితులు, అధికారుల సమావేశం గందరగోళంలో పడింది

హైదరాబాద్ రాజేంద్రనగర్‌లోని వాలంతరి వద్ద మూసీ రివర్ ఫ్రంట్ ప్రాజెక్టుపై తీవ్ర ఉద్రిక్తత నెలకొంది. మూసీ సుందరీకరణ పేరుతో ప్రభుత్వం పేదల భూములు గుంజుకుంటుందని బాధితులు మండిపడుతున్నారు. అధికారులు బాధితులతో సమావేశం ఏర్పాటు చేసిన నేపథ్యంలో పోలీసులు భారీగా మోహరించారు. మీడియాతో సహా ఎవరినీ లోపలికి అనుమతించలేదు.

మూసీ ప్రాజెక్టుకు వ్యతిరేకంగా భూనిర్వాసితులు తమ ఆగ్రహాన్ని వ్యక్తం చేశారు. ఎట్టి పరిస్థితుల్లోనూ భూములు ఇచ్చే ప్రసక్తి లేదని స్పష్టం చేశారు. పైసా పైసా కూడగట్టుకొని భూములు కొనుగోలు చేసిన తమ నుంచి బలవంతంగా భూములు గుంజుకోవడం సాధ్యం కాదని హెచ్చరించారు.

మూసీ రివర్ ఫ్రంట్ ప్రాజెక్టుకు సంబంధించి DPR ప్రజల ముందు బహిర్గతం చేయాలని భూనిర్వాసితులు డిమాండ్ చేస్తున్నారు. DPR లేకుండా ప్రాజెక్టు నిర్వహించడం సరికాదని అభిప్రాయపడుతున్నారు. అభివృద్ధి పేరుతో కేవలం రియల్ ఎస్టేట్ లాభాల కోసమే ఈ ప్రాజెక్టు చేపట్టారని విమర్శిస్తున్నారు.

టెండర్ల పేరుతో వేలాది కోట్ల ప్రజాధనాన్ని సొంత కంపెనీలకు కట్టబెట్టడానికే Congress ప్రభుత్వం ఈ ప్రణాళిక అమలు చేస్తుందని తీవ్ర విమర్శలు వ్యక్తమవుతున్నాయి. మూసీ నదిని శుద్ధి చేయడానికి తాము వ్యతిరేకం కాదని, కానీ పేదల భూములు గుంజుకొని సుందరీకరణ చేయడాన్ని మాత్రం ఎట్టి పరిస్థితుల్లోనూ ఒప్పుకోమని బాధితులు స్పష్టం చేశారు.