రాప్తాడులో రాజకీయ నేతల మధ్య మాటల యుద్ధం; పోలీసులు అప్రమత్తం

అనంతపురం జిల్లా రాప్తాడు నియోజకవర్గంలో రాజకీయ నేతల మధ్య మాటల యుద్ధం తీవ్రమైంది. మాజీ ఎమ్మెల్యే తోపుదుర్తి ప్రకాష్ రెడ్డి, ఎమ్మెల్యే ఎంఎస్ రాజు ఒకరిపై ఒకరు వ్యక్తిగత విమర్శలు, సవాళ్లు విసురుకున్నారు. ఈ వివాదంలో పరిటాల శ్రీరామ్ కూడా జోక్యం చేసుకున్నారు.

తన హత్యకు పరిటాల కుటుంబం కుట్ర చేసిందని, ఎంఎస్ రాజు రెండేళ్లలో కోట్లు సంపాదించారని తోపుదుర్తి ఆరోపించారు. ఈ ఆరోపణలను నిరూపించాలని ఎంఎస్ రాజు సవాలు చేస్తూ, రుజువు చేయకపోతే చెప్పుతో కొడతానని హెచ్చరించారు. ఇవాళ తోపుదుర్తి నివాసానికి వెళ్తానని ప్రకటించారు.

దీంతో తోపుదుర్తి స్పందిస్తూ, వచ్చి తేల్చుకోవాలని, తన ఇంటికి వైసీపీ కార్యకర్తలు రావాలని పిలుపునిచ్చారు. పోలీసులు అడ్డుపడినా తోసుకువచ్చేయండంటూ కార్యకర్తలను సమీకరించారు. పోలీసులు ఇరువురు నేతల ఇళ్ల వద్ద భారీ భద్రతా ఏర్పాట్లు చేశారు. తోపుదుర్తి ఇంటి వద్ద బారికేడ్లు నిలిపి, ఇంట్లో ఉన్న రాళ్లు, బీర్ బాటిళ్లను స్వాధీనం చేసుకున్నారు.

పరిటాల శ్రీరామ్ మాట్లాడుతూ, తోపుదుర్తి ధర్మవరంలో ఉండడం వల్లే ఇలాంటి ఆటలు సాగుతున్నాయని, రాప్తాడులో ఉంటే పరిస్థితి వేరేలా ఉండేదని హెచ్చరించారు. తోపుదుర్తి గురించి తీవ్ర వ్యాఖ్యలు చేస్తూ, వ్యక్తిగత రహస్యాలు బయటపెడతానన్నారు. ఈ ఘటన నేపథ్యంలో జిల్లాలో ఫ్యాక్షన్ రాజకీయాలు తిరిగి ప్రారంభమయ్యాయని చర్చ నడుస్తోంది. పరిస్థితి ఉద్రిక్తంగా ఉంది.