TGPSC ఒరిజినల్ OMR పత్రాలు హైదరాబాద్ రహదారిపై కనిపించాయి; విచారణ ప్రారంభం

హైదరాబాద్ పీవీఎన్ఆర్ ఎక్స్‌ప్రెస్ వేపై శనివారం రాత్రి వేల సంఖ్యలో TGPSC ఒరిజినల్ OMR జవాబు పత్రాలు రోడ్డుపై కనిపించాయి.

ఈ పత్రాలు 2018 లో జరిగిన వసతి గృహ సంక్షేమాధికారి పోస్టుల భర్తీ పరీక్షకు సంబంధించినవి. వాటిలో అభ్యర్థుల పేర్లు, హాల్ టికెట్ నెంబర్లు, ఇన్విజిలేటర్ల సంతకాలు స్పష్టంగా ఉన్నాయి.

సమాచారం అందుకున్న పోలీసులు ఘటనాస్థలికి చేరుకుని పత్రాలను స్వాధీనం చేసుకున్నారు. అత్యంత గోప్యమైన అభ్యర్థుల వివరాలు బహిరంగంగా కనిపించడంతో భద్రతాపరమైన ఆందోళనలు వ్యక్తమవుతున్నాయి.

రీసైక్లింగ్ కోసం ఈ పత్రాలను ముక్కలు చేసి పంపించాల్సి ఉండగా, గుత్తేదారు జబ్బార్ వాటిని విజయవాడకు తరలిస్తున్నారు. డ్రైవర్ నిర్లక్ష్యం కారణంగా పత్రాలు రోడ్డుపై పడిపోయినట్లు ప్రాథమిక విచారణలో తేలింది. పోలీసులు జబ్బార్ ను అదుపులోకి తీసుకున్నారు.

TGPSC ఇన్చార్జ్ కార్యదర్శి మాట్లాడుతూ, విచారణకు ఎస్పీ స్థాయి అధికారిని నియమించామని, మూడు రోజుల్లో నివేదిక ఇవ్వాలని ఆదేశించామని తెలిపారు. బాధ్యులపై కఠిన చర్యలు తీసుకుంటామని, భవిష్యత్తులో రికార్డుల నిర్వహణ, స్క్రాప్ విధానాలను పటిష్టం చేస్తామని స్పష్టం చేశారు.