ఆర్మూర్లో బాబాయి ఇంట్లో చోరీ కేసు: మేనల్లుడు సహా ముగ్గురు అరెస్ట్

నిజామాబాద్ జిల్లా ఆర్మూర్లో మే 24న జరిగిన ఒక ఇంటి చోరీ కేసును పోలీసులు ఛేదించారు. బాధితుడి ఇంట్లోనే ఆయన మేనల్లుడు విజయ్ అగర్వాల్ స్నేహితులతో కలిసి చోరీ చేసినట్లు పోలీసులు నిర్ధారించారు.

పోలీసులు తెలిపిన వివరాల ప్రకారం, విజయ్ అగర్వాల్ తన బాబాయి ఇంట్లో డబ్బులు, నగలు ఉన్న విషయం తెలుసుకున్నాడు. బాధితుడు వేములవాడకు వెళ్లిన సమయంలో, విజయ్ అగర్వాల్, సల్మాన్ ఖాన్, ముంజల్ సాయికుమార్, శ్రీహరి అనే మరొక వ్యక్తితో కలిసి ఇంటికి కన్నం వేసి దోపిడీ చేశారు.

ఈ కేసు దర్యాప్తులో భాగంగా, బ్రాహ్మణపల్లి క్రాస్ రోడ్ వద్ద అనుమానాస్పదంగా తిరుగుతున్న ముగ్గురిని పోలీసులు అదుపులోకి తీసుకున్నారు. వారిలో ప్రధాన నిందితుడు విజయ్ అగర్వాల్ ఉన్నాడు. నిందితుల నుండి 58 తులాల బంగారం, 35 తులాల వెండి, ₹19 లక్షల నగదు స్వాధీనం చేసుకున్నట్లు సీపీ సాయి చైతన్య తెలిపారు.

విజయ్ అగర్వాల్‌పై ఇప్పటికే రౌడీ షీట్ ఉన్నట్లు పోలీసులు వెల్లడించారు. శ్రీహరి అనే మరో నిందితుడు పరారీలో ఉన్నాడు. అతని కోసం గాలింపు కొనసాగుతోంది.

ఈ కేసు ఛేదించిన ఆర్మూరు పోలీసులను సీపీ అభినందించారు.