అనకాపల్లిలో వరాహ నదిలో ముగ్గురు విద్యార్థుల మృతి.. జాతీయ రహదారి దిగ్బంధం

అనకాపల్లి జిల్లా ఎస్ రాయవరం మండలం పెనుగొల్లు గ్రామంలో వరాహ నదిలో స్నానానికి దిగిన ముగ్గురు యువకులు గల్లంతయ్యారు. వారి మృతదేహాలు లభ్యమయ్యాయి. ముగ్గురూ విద్యార్థులని స్థానికులు తెలిపారు.

నిన్న సాయంత్రానికే ముగ్గురి మృతదేహాలను బయటకు తీసినట్టు సమాచారం. మృతదేహాలు ఆలస్యంగా లభ్యమవడంతో గ్రామంలో విషాదం నెలకొంది.

మృతుల కుటుంబాలకు న్యాయం జరగాలని, వెంటనే సహాయం అందాలని డిమాండ్ చేస్తూ గ్రామస్థులు, కుటుంబ సభ్యులు రోడ్డుపై నిరసనకు దిగారు. తొలుత గ్రామ ప్రధాన రహదారిపై నిరసన తెలిపారు. తర్వాత పాయకరావుపేట జాతీయ రహదారిని దిగ్బంధించారు.

హోమ్ మంత్రి అనిత ఘటనాస్థలానికి రావాలని నిరసనకారులు డిమాండ్ చేశారు. పెద్ద ఎత్తున నినాదాలు చేశారు.

హోమ్ మంత్రి అనిత నిన్న సాయంత్రం ఘటనాస్థలానికి వెళ్లి బాధిత కుటుంబాలను పరామర్శించినట్టు సమాచారం. ఈరోజు ఆమె వీడియో కాల్ ద్వారా నిరసనకారులతో మాట్లాడేందుకు ప్రయత్నించారు. కానీ నిరసనకారులు మాట్లాడేందుకు నిరాకరించినట్టు తెలుస్తోంది.

దీంతో జాతీయ రహదారిపై దాదాపు 20 కిలోమీటర్ల మేర ట్రాఫిక్ నిలిచిపోయింది.

ముగ్గురు విద్యార్థుల మృతిపై పూర్తిస్థాయి దర్యాప్తు జరగాలని నిరసనకారులు కోరుతున్నారు. బాధ్యులపై కఠిన చర్యలు తీసుకోవాలని డిమాండ్ చేస్తున్నారు. కళాశాల యాజమాన్యం పాత్రపైనా విచారణ జరగాలని చెబుతున్నారు.

త్వరితగతిన దర్యాప్తు జరిగితేనే తమకు న్యాయం జరుగుతుందని నిరసనకారులు చెబుతున్నారు.