మహారాష్ట్ర చంద్రపూర్‌లో నలుగురు రైతులను చంపిన పులి అటవీశాఖ బోనులో చిక్కింది

మహారాష్ట్రలోని చంద్రపూర్ జిల్లా చిమూరు తాలూకాలో నలుగురు రైతులను చంపిన పులిని అటవీశాఖ అధికారులు పట్టుకున్నారు. ఈ పులిని 'త్రిశూల్' అని పిలుస్తున్నారు. పులి పట్టుబడడంతో అటవీ ప్రాంతాలకు సమీపంలోని గ్రామాల ప్రజలు ఊపిరి పీల్చుకున్నారు.

అటవీశాఖ తెలిపిన వివరాల ప్రకారం, గత నెల 30న సదాశివ ఖడా సంగే ప్రాంతంలో పత్రు మేశ్రం అనే రైతు మృతి చెందారు. జూలై 6న నవాగావులో రాజేంద్ర బోయర్, ఏప్రిల్ 26న పహన్‌గావ్ పరిసరాల్లో శంకర్ మేశ్రం పులి దాడిలో చనిపోయారు.

పులి కోసం అటవీశాఖ ఐదు బృందాలతో వెతుకుడు చేపట్టింది. చిమూరు అటవీ ప్రాంతంలో ట్రాప్ కెమెరాలు ఏర్పాటు చేశారు. చివరకు గడగావ్ అటవీ ప్రాంతంలోని ఒక గ్రామం చివర్లో పులి కదలికలను అధికారులు గుర్తించారు.

షూటర్ అజయ్ మరాఠే సాయంతో పులికి మత్తుమందు ఇచ్చి స్పృహ కోల్పోయేలా చేశారు. డాక్టర్ రమాకాంత్ పర్యవేక్షణలో ఈ చర్య జరిగింది. పులిని చంద్రపూర్‌కు తరలించినట్లు అటవీశాఖ అధికారి మహేష్ గైక్వాడ్ తెలిపారు.

ఈ ఏడాది చంద్రపూర్ జిల్లాలో పులి దాడుల్లో 20 మందికి పైగా రైతులు, పశువుల కాపరులు మృతి చెందినట్లు సమాచారం. రెండు రోజుల క్రితం P122 అనే మరో పులిని అధికారులు పట్టుకున్నారు.

పులి దాడి జరిగిన తర్వాతే అధికారులు వస్తున్నారని, నష్టపరిహారం ఇస్తున్నారని అటవీ సమీప గ్రామాల ప్రజలు ఆరోపిస్తున్నారు. పులులు సంచరిస్తున్నా హెచ్చరికలు చేయడం లేదని వారు చెప్తున్నారు. అటవీశాఖ అధికారులపై చర్యలు తీసుకోవాలని ఆ గ్రామాలు కోరుతున్నాయి.