భద్రాద్రి కొత్తగూడెంలో మళ్ళీ పెద్దపులి సంచారం; అటవీ శాఖ హెచ్చరిక

భద్రాద్రి కొత్తగూడెం జిల్లా అశ్వరావుపేట మండలంలో ఒక పెద్దపులి మళ్ళీ సంచరిస్తున్నట్లు అటవీ శాఖ అధికారులు గుర్తించారు. ఈ ప్రాంతంలో గత ఫిబ్రవరిలో ఇదే పులి సంచరించి డజన్ల కొద్దీ పశువులను చంపింది. అప్పుడు అధికారులు దీనికి రేడియో సిగ్నల్ కాలర్ అమర్చి దట్టమైన అటవీ ప్రాంతానికి మళ్లించారు.

తాజాగా ఆ పులి తిరిగి వచ్చినట్లు పాదముద్రలు, ఇతర ఆధారాలు కనుగొన్నారు. ప్రస్తుతం ఈ పులి గుబ్బల మంగమ్మ ఆలయం, గోగులపూడి కావడిగుండ్ల అటవీ ప్రాంతాల్లో తిరుగుతోంది. ఆలయానికి 2-3 కిలోమీటర్ల దూరంలోనే ఇది సంచరిస్తున్నందున, భక్తులకు అటవీ సిబ్బంది పర్యవేక్షణలో ఉదయం మాత్రమే దర్శించుకోవడానికి అనుమతి ఇస్తున్నారు.

అటవీ శాఖ అధికారులు గ్రామస్తులను అప్రమత్తం చేశారు. ప్రజలు ఒంటరిగా అడవికి, పొలాలకు వెళ్లవద్దని, పశువులను అటవీ ప్రాంతంలో మేపవద్దని మైక్ ద్వారా ప్రకటనలు చేస్తున్నారు. రైతులు, పశువుల కాపరులు ఎక్కువ మంది కలిసి ఉండాలని సూచించారు. పులి సంచారాన్ని గుర్తించిన వెంటనే అధికారులకు సమాచారం అందించాలని చెప్పారు.

ఫారెస్ట్ అధికారులు తెలిపిన దాని ప్రకారం, వారం నుంచి పది రోజుల్లో పులిని మళ్ళీ దట్టమైన అడవుల్లోకి మళ్లించే ప్రయత్నం చేస్తామని తెలిపారు. అప్పటి వరకు ప్రజలు జాగ్రత్తగా ఉండాలని హెచ్చరించారు.