తిరుమలలో వాహనాల రద్దీ: మూడు రోజుల్లో 33వేల వాహనాలు, దర్శనానికి సమయం ఎక్కువ

తిరుమల శ్రీ వేంకటేశ్వర స్వామి దర్శనానికి వచ్చే భక్తుల రద్దీతో పాటు వాహనాల సంఖ్య కూడా విపరీతంగా పెరిగింది. శనివారం నుంచి సోమవారం వరకు మూడు రోజుల సెలవుల నేపథ్యంలో 33,000 వాహనాలు తిరుమలకు చేరుకున్నాయి.

టిటిడి (TTD) అంచనా ప్రకారం శనివారం 12,000, ఆదివారం 11,000, సోమవారం 10,000 వాహనాలు వచ్చాయి. వాహనాల తనికీ కోసం అలిపిరి చెక్‌పోస్ట్ వద్ద భక్తులు గంటకు పైగా వేచి ఉండాల్సిన పరిస్థితి ఏర్పడింది. ఘాట్ రోడ్లలో తీవ్ర ట్రాఫిక్ ఇబ్బందులు ఎదురయ్యాయి.

నిత్యం 80,000 మందికి పైగా భక్తులు దర్శనం చేసుకుంటుండగా, రోజువారీ సగటున 10,000 పైగా వాహనాలు తిరుమలకు వస్తున్నాయి. వాహనాల రద్దీని నియంత్రించడానికి గరుడా సర్కిల్ వద్ద బ్యారికేడ్లు ఏర్పాటు చేసి, వాహనాలను జూ పార్క్ రోడ్డు వైపు మళ్లిస్తున్నారు.

వాహనాల సంఖ్య పెరుగుతూవస్తున్న దృష్ట్యా, భవిష్యత్తులో మరింత నియంత్రణ కోసం టిటిడి అలిపిరి వద్ద ఒక బేస్ క్యాంప్ ఏర్పాటు చేయనుంది. ఈ ప్రాజెక్టులో 4,000 గదులు ఉండేటట్లు భారీ నిర్మాణం చేపట్టి, భక్తులు తమ వాహనాలను అక్కడే నిలిపి తిరుమలకు వెళ్లేలా ప్రణాళిక సిద్ధం చేసింది. త్వరలో ఈ ప్రాజెక్టుకు టెండర్లు ఆహ్వానించే అవకాశం ఉంది.