తిరుమలలో భక్తుల రద్దీ పెరిగింది; జ్యేష్టాభిషేకం కారణంగా ఆర్జిత సేవలు రద్దు

తిరుమల శ్రీవారి ఆలయంలో భక్తుల రద్దీ మరోసారి పెరిగింది. కొద్దిరోజుల విరామం తర్వాత వైకుంఠం క్యూ కాంప్లెక్స్‌లోని 31 కంపార్ట్‌మెంట్లు భక్తులతో నిండిపోయాయి. బుధవారం 70 వేల మందికి పైగా భక్తులు స్వామివారిని దర్శించుకున్నారు. గురువారం కూడా అదే స్థాయిలో దర్శనాలు ఉంటాయని టీటీడీ అధికారులు తెలిపారు.

టోకెన్లు లేని భక్తులకు సర్వదర్శనానికి సుమారు 12 గంటల సమయం పడుతోంది. ప్రత్యేక ప్రవేశ దర్శనం టిక్కెట్లు ఉన్నవారికి, సర్వదర్శనం టోకెన్లు కలిగిన భక్తులకు 4-5 గంటల్లో దర్శనం కల్పిస్తామని టీటీడీ ప్రకటించింది.

జ్యేష్టాభిషేకం ఉత్సవాల నేపథ్యంలో జూన్ 28న శ్రీవారి ఆలయంలో అన్ని ఆర్జిత సేవలు రద్దు చేస్తున్నట్లు టీటీడీ తెలిపింది. ఉత్సవమూర్తులైన మలయప్ప స్వామి వారి పంచలోహ కవచాలను సడలింపు చేసి, మరమత్తులు నిర్వహించే వార్షిక సంప్రదాయమే ఈ జ్యేష్టాభిషేకం. 1980 నుంచి ప్రతి ఏటా జరిగే ఈ కార్యక్రమం విగ్రహాలు అరిగిపోకుండా కాపాడుతుంది.

మూడు రోజుల పాటు సాగే ఈ ఉత్సవాలు శుక్రవారం నుంచి ప్రారంభం కానున్నాయి. మొదటి రోజున స్వామి అమ్మవార్లకు స్నపన తిరుమంజనం, వజ్ర కవచ ధారణ; రెండో రోజు ముత్యాల కవచ అలంకరణ; మూడో రోజు మరమత్తు చేసిన కవచాలతో పూర్తి స్థాయి అలంకరణ జరుగుతుంది. ఆ తర్వాత ఏడాది మొత్తం స్వామివారు స్వర్ణ కవచంలోనే భక్తులకు దర్శనమిస్తారు.