తిరుమల నవంబర్ ఉత్సవ క్యాలెండర్ విడుదల: ఏ రోజు ఏ వేడుక?

తిరుమల శ్రీవారి ఆలయంలో నవంబర్ నెలలో జరిగే ఉత్సవాల క్యాలెండర్ విడుదలైంది. నవంబర్ 2 నుంచి 25 వరకు వరుసగా విశేష ఉత్సవాలు జరుగుతాయి. ఈ ఉత్సవాల ఏర్పాట్లను TTD చేపడుతోంది.

తిరుమలలో ప్రతిరోజూ ఏదో ఒక ఉత్సవం జరుగుతుంది. అందుకే శ్రీనివాసుడిని ఉత్సవ ప్రియుడు అంటారు. ఈ నెలలో మొదటి విశేష వేడుక నవంబర్ 2న తిరుమలనంబి ఉత్సవంతో మొదలవుతుంది. నవంబర్ 4న శ్రీ మణవాళ మహాముని ఉత్సవం ప్రారంభమవుతుంది.

నవంబర్ 8న శ్రీవారి ఆలయంలో దీపావళి ఆస్థానం జరుగుతుంది. 11న తిరుమలనంబి సాత్తుముర నిర్వహిస్తారు. 13న నాగుల చవితి, పెద్దశేష వాహన సేవ, మణవాళ మహామునుల సాత్తుముర ఉంటాయి. 14న సేనై ముదలియార్ వర్ష తిరునక్షత్రం జరుగుతుంది.

నవంబర్ 15న శ్రీవారి పుష్పయాగానికి అంకురార్పణ జరుగుతుంది. అదే రోజు తిరుమంగై ఆల్వార్ వర్ష తిరునక్షత్రం ఉంటుంది. 16న శ్రీవారి పుష్పయాగం నిర్వహిస్తారు. అదే రోజు అత్రి మహర్షి, పిళ్లై లోకాచార్య, పోయిగై ఆల్వార్ వర్ష తిరునక్షత్రాలు ఉంటాయి. 19న యాజ్ఞమల్క జయంతి జరుగుతుంది.

21న కైశిక ద్వాదశి ఆస్థానం, శ్రీ చక్రతీర్థ ముక్కోటి వైభవంగా నిర్వహిస్తారు. 24న కార్తీక దీపోత్సవాన్ని ఘనంగా నిర్వహించేందుకు ఏర్పాట్లు జరుగుతున్నాయి. అదే రోజు తిరుమంగై ఆల్వార్ సాత్తుముర ఉంటుంది. 25న తిరుప్పాణాళ్వార్ వర్ష తిరునక్షత్రం కోసం TTD ఏర్పాట్లు చేస్తోంది.