తిరుమలలో పుష్పయాగం: 15న అంకురార్పణ, 16న ఎనిమిది టన్నుల పూలతో పుష్పార్చన

తిరుమల శ్రీవారి పుష్పయాగ మహోత్సవానికి ఈ నెల 15న అంకురార్పణ జరగనుంది. శ్రీ శరణాధిపతి వారు ఉత్సవం జరుపుకుంటూ వసంత మండపానికి చేరుకుంటారు. అక్కడ పుణ్యావాచనం, మేదిని పూజ నిర్వహించి పుట్టమన్ను సేకరిస్తారు. ఆ పుట్టమన్నును ఆలయంలోని కళ్యాణ మండపానికి తీసుకొచ్చి, వేద మంత్రాల మధ్య అంకురార్పణ చేయడంతో ఉత్సవం ప్రారంభమవుతుంది.

పుష్పయాగం ఈ నెల 16న జరుగుతుంది. ఆంధ్రప్రదేశ్, తమిళనాడు, కర్ణాటక నుంచి తెప్పించిన దాదాపు ఎనిమిది టన్నుల పూలతో ఈ ఉత్సవం జరుగుతుంది. బంతి, చేమంతి, మల్లె, మందారం, గులాబీ, విరజాజి, మరువం, ధవనం, జాజి, సంపంగి, మూడు రకాల గులాబీలు, కదిర పచ్చ, బిల్వ, కనకాంబరం, కమలం, మొగలి సహా మొత్తం 18 రకాల పూలను వాడతారు.

వేద మంత్రోచ్ఛారణలు, మంగళ వాయిద్యాల నడుమ అర్చకులు భూదేవి సమేత మలయప్ప స్వామిని కళ్యాణ మండపానికి తీసుకొస్తారు. కంకణాలు ధరింపజేసి ఉత్సవ మూర్తులకు స్నపన తిరుమంజనం చేస్తారు. అనంతరం దాదాపు ఏడు సార్లు శ్రీదేవి భూదేవి సమేత మలయప్ప స్వామికి పుష్పార్చన చేస్తారు. కర్పూర హారతితో పుష్పయాగం ముగుస్తుంది.

బ్రహ్మోత్సవాల సమయంలో ద్రవ్యలోపం, భక్తి లోపం, అకాల పూజలు, కాలాతీత పూజల వల్ల ఏదైనా లోపం జరిగి ఉంటే క్షమించమని కోరుతూ ఈ యాగం చేస్తారు. స్వామి వారి జన్మ నక్షత్రమైన శ్రవణ నక్షత్రం రోజున ఈ ఉత్సవం జరపడం ఆనవాయితీ. క్రీస్తు శకం 15వ శతాబ్దం నాటి శాసనాల్లో ఈ ఉత్సవ ప్రస్తావన ఉంది. అర్ధాంతరంగా నిలిచిపోయిన ఈ ఉత్సవాన్ని 1884 నవంబర్ 14న వేదాంతం జగన్నాథాచార్యులు పునరుద్ధరించారు. అప్పటి నుంచి టిటిడి ప్రతి ఏడాది బ్రహ్మోత్సవాల తర్వాత ఈ పుష్పయాగాన్ని నిర్వహిస్తోంది.

పుష్పయాగం కారణంగా ఈ నెల 16న కళ్యాణోత్సవం, ఉంజల్ సేవ, ఆర్జిత బ్రహ్మోత్సవం సేవలను టిటిడి రద్దు చేసింది. పుష్పయాగం తర్వాత సహస్ర దీపాలంకరణ సేవ జరుగుతుంది. అనంతరం స్వామి వారు మాడవీధుల్లో విహరిస్తూ భక్తులకు దర్శనం ఇస్తారు. భక్తులు ప్రత్యక్ష ప్రసారం ద్వారా ఈ ఉత్సవాన్ని వీక్షించవచ్చు.