తిరుమల: అన్నప్రసాదాల నాణ్యత కోసం రూ.25 కోట్ల అత్యాధునిక ఫుడ్ ల్యాబ్ ప్రారంభం

తిరుమలలో శ్రీవారి భక్తులకు అందించే అన్నప్రసాదాలు, తాగునీటి నాణ్యత పరీక్షించేందుకు అత్యాధునిక ఫుడ్ ల్యాబొరేటరీ అందుబాటులోకి వచ్చింది. టీటీడీ, ఎఫ్ఎస్ఎస్ఏఐ సంయుక్తంగా రూ.25 కోట్ల వ్యయంతో ఈ స్టేట్ ఫుడ్ ల్యాబొరేటరీని నిర్మించాయి.

టీటీడీ అడిషనల్ ఈఓ వెంకయ్య చౌదరి ఈ ల్యాబ్ పూర్తి స్థాయి సేవలను ప్రారంభించి, మొదటి అధికారిక నివేదికను పరిశీలించారు. అన్నం, సాంబారు, రసం, చట్నీ, లడ్డూలు, తాగునీరుతో పాటు టీటీడీ కొనుగోలు చేసే నెయ్యి, పప్పు దినుసులు వంటి అన్ని సరుకుల నాణ్యతను ఇక్కడ పరీక్షించనున్నట్లు ఆయన తెలిపారు.

ల్యాబ్లో అత్యాధునిక పరికరాలు ఏర్పాటు చేశామని, అనుభవజ్ఞులైన సాంకేతిక నిపుణులు పర్యవేక్షిస్తారని వెంకయ్య చౌదరి వివరించారు. ఎఫ్ఎస్ఎస్ఏఐ నిబంధనల ప్రకారం అన్ని పరీక్షలు నిర్వహించి, సురక్షితమైన ఆహారమే భక్తులకు చేరేలా చూస్తామని ఆయన ధృవీకరించారు.

తిరుమలలో ప్రతిరోజూ లక్షలాది మంది భక్తులకు అన్నప్రసాదాలు అందజేస్తారు. సొంత పరీక్షా కేంద్రం రావడంతో నాణ్యత నియంత్రణ మరింత సమర్థంగా జరుగుతుందని టీటీడీ వర్గాలు తెలిపాయి. ల్యాబ్ పూర్తి స్థాయిలో సేవలు అందించేందుకు అన్ని రకాల పరీక్షలు ఇప్పటికే ప్రారంభమయ్యాయి.