తిరుమల రద్దీ: సర్వదర్శనానికి 18 గంటల సమయం, ఈ ఏడాది రెండు బ్రహ్మోత్సవాలు

తిరుమల శ్రీ వెంకటేశ్వర స్వామి దర్శనం కోసం భక్తులు పెద్ద సంఖ్యలో వస్తుండడంతో భారీ రద్దీ ఏర్పడింది.

సర్వదర్శనం క్యూలో టోకెన్లు లేకుండా వచ్చిన భక్తులకు 18 గంటల సమయం పడుతుందని టీటీడీ అధికారులు గురువారం తెలిపారు. 300 రూపాయల టికెట్ ఉన్న భక్తులకు 6 గంటలు, సర్వదర్శనం టోకెన్లు ఉన్న భక్తులకు 8 గంటలు దర్శన సమయంగా ప్రకటించారు.

క్యూ లైన్ శిలాతోరణం వరకు విస్తరించింది. బుధవారం 82 వేల మంది భక్తులు స్వామిని దర్శించుకున్నారు. ప్రత్యేక సేవలు ఉన్నప్పటికీ గురువారం భక్తులకు దర్శనం కల్పించేందుకు చర్యలు తీసుకుంటున్నారు.

భక్తుల కానుకల రూపంలో శ్రీవారి హుండి ఆదాయం రూ. 5.15 కోట్లుగా నమోదైంది. 4.25 లక్షల లడ్డూలు అమ్ముడయ్యాయి. 2.57 లక్షల మంది భక్తులు అన్నప్రసాదం స్వీకరించారు.

టీటీడీ మరో ప్రకటనలో, అధిక మాసం వల్ల ఈ ఏడాది శ్రీవారికి రెండు బ్రహ్మోత్సవాలు జరుగుతాయని తెలిపింది. సెప్టెంబర్‌లో వార్షిక బ్రహ్మోత్సవాలు, అక్టోబర్‌లో నవరాత్రి బ్రహ్మోత్సవాలు నిర్వహించనున్నారు. వీటి నిర్వహణకు ప్రణాళికలు రూపొందిస్తున్నారు.