జంగారెడ్డిగూడెం బ్యాంక్ ఆఫ్ బరోడాలో గోల్డ్ లోన్ కుంభకోణం: ప్రధాన నిందితుడు అరెస్ట్

ఏలూరు జిల్లా జంగారెడ్డిగూడెంలోని బ్యాంక్ ఆఫ్ బరోడా శాఖలో గోల్డ్ లోన్ కుంభకోణం వెలుగులోకి వచ్చింది. ఈ కేసులో పోలీసులు ప్రధాన నిందితుడు, గోల్డ్ అప్రైజర్ చెలపకరాజును అరెస్ట్ చేశారు.

దాదాపు రూ.10 కోట్ల విలువైన 6.449 కిలోల బంగారం ఆభరణాలు తాకట్టు నుండి మాయమైనట్లు గుర్తించారు. అరెస్ట్ చేసిన నిందితుడి నుంచి 4.120 కిలోల బంగారాన్ని, రూ.10 లక్షల నగదును స్వాధీనం చేసుకున్నారు. ఈ ఘటనలో 176 మంది ఖాతాదారులు నష్టపోయినట్లు ప్రాథమిక దర్యాప్తులో తేలింది.

బ్యాంకు రికార్డుల్లో తక్కువ బరువు చూపించి అదనపు బంగారాన్ని అప్రైజర్ సొంతం చేసుకున్నాడని పోలీసులు తెలిపారు. కొత్త గోల్డ్ లోన్ల పేరుతో ఖాతాదారుల నుండి బంగారం తీసుకొని, తక్కువ రుణం ఇచ్చి, మిగిలినదాన్ని మాయం చేశాడు. దీన్ని స్థానిక బంగారం దుకాణాలకు, తాకట్టు వ్యాపారులకు విక్రయించి లాభం పొందినట్లు ఆరోపణలు ఉన్నాయి.

ఈ కేసు జూన్ 16న జంగారెడ్డిగూడెం పోలీస్ స్టేషన్‌లో నమోదైంది. ఏలూరు ఎస్పీ కే. ప్రతాప్ శివకిషోర్ పర్యవేక్షణలో, ఏఎస్పీ సుస్మిత ఆధ్వర్యంలో దర్యాప్తు జరిగింది.

మోసంలో బ్యాంకు అధికారులు ఐదుగురి పాత్ర ఉన్నట్లు అనుమానాలు ఉన్నాయని ఎస్పీ తెలిపారు. పూర్తి విచారణ తర్వాత వారిపై కూడా చర్యలు తీసుకోవచ్చునని చెప్పారు. ఇంకా రికవరీ కాని 2 కిలోల బంగారం కోసం ప్రయత్నాలు కొనసాగుతున్నాయి.