10 బహుళ-గ్రామ తాగునీటి పథకాలకు ₹9,355 కోట్లు, ఎన్ఐఏ కోర్టు, రుణమాఫీతో ఏపీ కేబినెట్ కీలక నిర్ణయాలు

ఏపీ మంత్రివర్గ సమావేశం ముగిసింది. ఈ సమావేశంలో 30కి పైగా అజెండా అంశాలకు ఆమోదం లభించింది. రాష్ట్రవ్యాప్తంగా 10 బహుళ-గ్రామ తాగునీటి పథకాలను ₹9,355 కోట్లతో చేపట్టేందుకు మంత్రివర్గం ఆమోదించింది. నీటి ఎద్దడి ఉన్న ప్రాంతాల్లో 2,943 తాగునీటి పథకాలను ₹1,801 కోట్లతో అమలు చేసే ప్రతిపాదనకూ గ్రీన్ సిగ్నల్ లభించింది.

విశాఖపట్నంలో ఎన్ఐఏ కేసుల విచారణ కోసం ప్రత్యేక కోర్టు ఏర్పాటుకు ఆమోదం లభించింది. తిరుపతి జిల్లాలో 63.01 ఎకరాల్లో లాజిస్టిక్స్ పార్క్ నిర్మాణం, పర్యాటక ప్రచారానికి ₹50 కోట్ల నిధుల వినియోగం, వివిధ నగరాల్లో హోటల్ ప్రోత్సాహకాలకు కూడా మంత్రివర్గం ఓకే చెప్పింది.

క్యాన్సర్ నిర్వహణకు ప్రత్యేక విధానం తీసుకురావాలని నిర్ణయించారు. విశాఖపట్నం, గుంటూరు, నెల్లూరులో అంబేద్కర్ గురుకుల సెంటర్స్ ఆఫ్ ఎక్సలెన్స్, ఐఐటి జెఈఈ, నీట్ కోచింగ్ సెంటర్ల ఏర్పాటుకు అనుమతి ఇచ్చారు. పెద్దగెడ్డ రిజర్వాయర్ ఆధునికీకరణ, కుప్పం నియోజకవర్గంలో ఫీడర్ ఛానల్స్, బీరగానిపల్లె రిజర్వాయర్ నిర్మాణానికి అనుమతులు మంజూరయ్యాయి.

అమరావతి రాజధాని నిర్మాణం కోసం రెండో విడత భూసమీకరణలో భాగంగా ఏడు గ్రామాల రైతులకు కుటుంబానికి గరిష్టంగా ₹1.50 లక్షల వరకు వ్యవసాయ రుణమాఫీ చేయాలని నిర్ణయించారు. 2026 జనవరి 6 ముందు తీసుకున్న రుణాలకే ఈ మాఫీ వర్తిస్తుంది. భారీ పెట్టుబడులకు ప్రోత్సాహకాలు, సీఆర్డీఏ భూముల కేటాయింపులకు కూడా ఆమోదం లభించింది.