టోకెన్లు లేని భక్తులకు తిరుమలలో సర్వదర్శనం కోసం 18 గంటల నిరీక్షణ

టోకెన్ లేకుండా సర్వదర్శనానికి వచ్చే భక్తులు సుమారు 18 గంటలు వేచి ఉండాల్సి వస్తోందని టీటీడీ అధికారులు మంగళవారం తెలిపారు. శిలాతోరణం వద్ద క్యూలో చేరే వారికి మరింత సమయం పట్టొచ్చని వారు చెప్పారు.

తిరుమలలో రోజువారీ దర్శనాల సంఖ్య ఇటీవల భారీగా పెరిగింది. గతంలో సగటున 50 వేల మందికి దర్శనం కల్పించడం కష్టంగా ఉండేది. ఇప్పుడు ఆ సంఖ్య 75 వేలు దాటింది. గడిచిన మూడు రోజులుగా 80 వేల మార్కును దాటడం విశేషం. శని, ఆదివారాల్లో 77 వేల మందికి పైగా, సోమవారం 81 వేల మంది భక్తులు స్వామివారిని దర్శించుకున్నారు.

అధిక సంఖ్యలో భక్తులు రావడంతో వైకుంఠం క్యూ కాంప్లెక్స్ చాలా రోజులు నిండిపోయింది. నారాయణగిరి షెడ్లు దాటి క్యూ లైన్లు శిలాతోరణం వరకు విస్తరించాయి. దాంతో వేచి ఉండే సమయం పెరుగుతోంది. మంగళవారం సాయంత్రం కూడా భక్తులు శిలాతోరణం వరకు క్యూలో ఉన్నట్లు అధికారులు తెలిపారు.