తిరుపతి జిల్లాలో కర్ర కొరతతో రాజా-రాణి బొమ్మల తయారీదారుల ఇబ్బందులు; ప్రభుత్వ సాయం కోరుతున్నారు

తిరుపతి జిల్లా శెట్టిగుంట, లక్ష్మీగారిపల్లి గ్రామాల్లో రాజా-రాణి చెక్క బొమ్మల తయారీ ప్రసిద్ధిగాంచింది. 400 కుటుంబాలు ఈ వృత్తిపై ఆధారపడి జీవిస్తున్నాయి. 1993లో శ్రీ లక్ష్మీ వెంకటేశ్వర ఆర్టిస్టిక్ వుడెన్ టాయ్ మేకర్స్ కోఆపరేటివ్ సొసైటీగా ఏర్పాటు చేసుకున్న ఈ కళాకారులు, తిరుపతి, తిరుమల సహా పలు పుణ్యక్షేత్రాల్లో బొమ్మలను విక్రయిస్తారు.

రాయలసీమతో పాటు తమిళనాడు, కర్ణాటకల్లోనూ ఈ బొమ్మలకు డిమాండ్ ఉంది. వివాహాలు, దసరా, సంక్రాంతి పండగల్లో వీటిని బహుమతులుగా ఇస్తారు. అయితే బొమ్మల తయారీకి అవసరమైన కర్ర లభ్యత తగ్గడం, మార్కెటింగ్ సదుపాయాలు లేకపోవడంతో కళాకారులు నష్టపోతున్నారు.

గతంలో ఎర్రచందనం వాడేవారు. అది నిషేధమైన తర్వాత తేకు, పగడ, ముష్టి వంటి కర్రలతో బొమ్మలు తయారు చేస్తున్నారు. కానీ కర్ర సరఫరా సరిగా లేదని, ప్రభుత్వం సబ్సిడీపై కలప ఇవ్వాలని కోరుతున్నారు. ఒక కళాకారుడు ఇలా చెబుతున్నారు: “కొయ్య దొరక్క ఇబ్బంది పడుతున్నాం. ప్రభుత్వం సబ్సిడీ ఇస్తే మంచి కొయ్య వాడి పని చేసుకోగలం.”

ఆర్థిక సహాయంతోపాటు గ్రామంలో ఒక షెడ్ కావాలని, తద్వారా వర్షం వచ్చినా కుటుంబాలన్నీ కలిసి పని చేయవచ్చని వారు విజ్ఞప్తి చేస్తున్నారు. ప్రభుత్వం స్టాల్స్ ఏర్పాటు చేస్తే సొంతంగా అమ్ముకుని ఎక్కువ లాభం పొందే అవకాశం ఉందని అంటున్నారు.

లేపాక్షి సంస్థ బొమ్మలకు డ్రెస్సింగ్ పై శిక్షణ ఇచ్చింది. ఒక జత బొమ్మ తయారీకి గంట నుంచి గంటన్నర సమయం పడుతుంది. డ్రెస్సింగ్ చేసిన జతకు రూ.400-500 చెల్లిస్తారు. రోజుకు 3-4 జతలు తయారు చేయగలరు. సరైన ధర రాకపోవడంతో ఆర్థికంగా వెనుకబడిపోతున్నామని వారు ఆవేదన వ్యక్తం చేస్తున్నారు.

శ్రీలంక విమానాశ్రయంలో తమ బొమ్మలు డాలర్లకు అమ్ముతున్నారని, ప్రభుత్వం తమకు ఎగుమతి అవకాశాలు కల్పించాలని కోరుతున్నారు. సబ్సిడీ రుణాలు, మార్కెటింగ్ సాయం ఉంటే ఆర్థికంగా పురోగతి సాధించగలమని చెబుతున్నారు.