భారత్-పాక్ ట్రాక్ టు చర్చలు ప్రైవేట్ సమావేశాలే: విదేశాంగ కార్యదర్శి విక్రమ్ మిస్రి స్పష్టీకరణ

భారత్-పాకిస్థాన్ మధ్య ఇటీవల కొలంబోలో ట్రాక్ టు దౌత్య సంభాషణలు జరిగినట్లు వచ్చిన నివేదికలపై భారత విదేశాంగ కార్యదర్శి విక్రమ్ మిస్రి స్పందించారు. ఈ సమావేశాలన్నీ ప్రైవేట్ వ్యక్తులు నిర్వహించినవే తప్ప భారత ప్రభుత్వానికి ఎలాంటి సంబంధం లేదని ఆయన స్పష్టం చేశారు.

ప్రపంచ వ్యాప్తంగా వివిధ అంశాలపై డజన్ల కొద్దీ ఇలాంటి కార్యక్రమాలు జరుగుతుంటాయని, ఇవి కొత్తేమీ కాదని విక్రమ్ మిస్రి పేర్కొన్నారు. ‘ఈ సమావేశాల్లో భారత ప్రభుత్వం ఎలాంటి అధికారిక భాగస్వామ్యం, మద్దతు లేదా ప్రమేయం లేదు. వీటిలో పాల్గొనే వ్యక్తులు రిటైర్డ్ దౌత్యవేత్తలు, మాజీ సైనిక అధికారులు, సివిల్ సొసైటీ ప్రతినిధులు అయినా, వారు తమ స్వంత అభిప్రాయాలను మాత్రమే వ్యక్తం చేస్తారు. భారత ప్రభుత్వ అభిప్రాయాన్ని వారు ఏ విధంగానూ ప్రాతినిధ్యం వహించలేరు’ అని ఆయన వివరించారు.

ఇటువంటి సమావేశాలకు తాము ఎలాంటి ప్రాధాన్యం ఇవ్వడం లేదని, వాటిపై ప్రత్యేక దృష్టి పెట్టాల్సిన అవసరం లేదని విక్రమ్ మిస్రి అన్నారు. భారత్-పాకిస్థాన్ సంబంధాలు 2019 పుల్వామా దాడి, అనంతరం ఆర్టికల్ 370 రద్దు తర్వాత తీవ్రంగా దెబ్బతిన్న సంగతి తెలిసిందే. ప్రస్తుతం రెండు దేశాల మధ్య దౌత్య సంబంధాలు స్తంభించిన పరిస్థితి కొనసాగుతోంది.