ఒకే రోజులో లక్నో నుండి చైనా సరిహద్దుకు తరలించి ముగ్గురు కైలాస యాత్రికులను సమూహంలో చేర్చిన ట్రావెల్ ఏజెన్సీ

హైదరాబాద్ కు చెందిన శ్రీ గాయత్రి టూర్స్ అండ్ ట్రావెల్స్ సంస్థ, ఒక రోజు వ్యవధిలో లక్నో నుండి నేపాల్ మీదుగా చైనా సరిహద్దు వరకు ప్రయాణించి, ముగ్గురు ఆలస్యంగా వచ్చిన కైలాస యాత్రికులను వారి సమూహంలో చేర్చింది. ఈ కార్యక్రమానికి సంస్థ హెలికాప్టర్ సేవలను ఉపయోగించింది.

114 మంది యాత్రికులు హైదరాబాద్ నుండి లక్నో, నేపాల్‌గంజ్, సిమీకోట్, హిల్సా మార్గంలో చైనా సరిహద్దుకు చేరుకున్నారు. కానీ, ముగ్గురు యాత్రికులు తమ కుటుంబంలో చనిపోయిన పెద్దల 11వ రోజు కార్యక్రమం నిర్వహించాల్సి రావడంతో ఆలస్యంగా లక్నోలో దిగారు. గ్రూప్ వీసా నిబంధనల ప్రకారం అందరూ సరిహద్దు వద్ద ఉండాల్సి రావడంతో, ఆ ముగ్గురినీ తక్షణం చేర్చుకోకపోతే మొత్తం గ్రూప్ అనుమతి రద్దయ్యే ప్రమాదం ఏర్పడింది.

ఈ పరిస్థితిని గుర్తించిన ట్రావెల్ ఏజెన్సీ ప్రతినిధులు, లక్నో విమానాశ్రయం నుండి వారిని కారులో నేపాల్‌గంజ్ (ఇండియా-నేపాల్ సరిహద్దు) కు తీసుకెళ్లారు. అక్కడ ఎస్ఎస్బీ పోలీసుల సహకారంతో బ్యాగేజీ స్కానింగ్, ఎంబసీ స్టాంపింగ్ వేగంగా పూర్తి చేయించారు. ఆ తర్వాత నేపాల్‌గంజ్ ఎయిర్‌పోర్టు నుండి ఒక హెలికాప్టర్ ఏర్పాటు చేసి, ముగ్గురినీ నేరుగా చైనా సరిహద్దుకు చేరవేశారు. అప్పటికే అక్కడ 114 మంది యాత్రికుల ఎంట్రీ ప్రక్రియ జరుగుతుండగా, కేవలం 13 నిమిషాల వ్యవధిలో ఈ ముగ్గురినీ సమూహంలో కలిపారు.

సంస్థ ప్రతినిధి మాట్లాడుతూ, వీరు గత ఒక సంవత్సరంగా క్రమం తప్పకుండా తమ సంస్థ ద్వారా పేమెంట్లు చేశారని, జీవితకాల లక్ష్యమైన కైలాస యాత్రను విజయవంతం చేయడానికి కొంత ఖర్చు భరించామని తెలిపారు. టూర్ ఆపరేటర్‌కు ఫీల్డ్‌లో ఉన్న పట్టు, సత్వర నిర్ణయాల ఫలితంగానే ఇది సాధ్యమైందని ఆయన పేర్కొన్నారు. ఈ ఘటనకు సంబంధించిన వీడియో సోషల్ మీడియాలో వైరల్‌గా మారింది.