డెమోక్రాట్ల ఆమోదంతో బిలియన్ల మోసాలని ట్రంప్ ఆరోపణ.. మిడ్‌టర్మ్ ఎన్నికల ముందు ప్రసంగం

డెమోక్రాట్ల ఆమోదంతో బిలియన్ల కొద్దీ మోసాలు జరిగాయని అమెరికా అధ్యక్షుడు డొనాల్డ్ ట్రంప్ ఆరోపించారు. మిడ్‌టర్మ్ ఎన్నికలకు ముందు ఆయన చేసిన ప్రసంగంలో ఈ ఆరోపణలే ప్రధానాంశంగా నిలిచాయి.

తమ ప్రభుత్వం దేశ చరిత్రలోనే అత్యధిక పన్ను కోతలను అమలు చేసిందని, విదేశీ మోసగాళ్లకు, అక్రమ వలసదారులకు ఇస్తున్న సంక్షేమ పథకాలను నిలిపివేసిందని ట్రంప్ తెలిపారు. ఈ చర్యల ద్వారా మిన్నెసోటా సహా పలు రాష్ట్రాల్లో జరిగిన మోసాలు వెలుగులోకి వచ్చాయని ఆయన అన్నారు. ఇప్పటికే వంద బిలియన్ డాలర్లకు పైగా రాబట్టామని, త్వరలో వందల బిలియన్ డాలర్లను రాబట్టనున్నట్టు పేర్కొన్నారు. ఈ మోసాలు ఎక్కువగా డెమోక్రాట్లు నడిపే రాష్ట్రాల్లోనే జరిగాయని ఆరోపించారు. ఏయే రాష్ట్రాలు, ఎలాంటి మోసాలు అనే వివరాలను ఆయన ప్రసంగంలో వివరించలేదు.

ఇంధన రంగంపై మాట్లాడుతూ, తక్కువ ఖర్చుతో కూడిన ఇంధనాన్ని తాము ప్రోత్సహిస్తున్నామని, డెమోక్రాట్ల 'గ్రీన్ న్యూ స్కామ్' వల్లే రికార్డు స్థాయి ద్రవ్యోల్బణం, చరిత్రలోనే అత్యధిక ధరలు వచ్చాయని విమర్శించారు. 'డ్రిల్, బేబీ, డ్రిల్' నినాదంతో దేశం భారీ సంపదను సృష్టిస్తోందని, చమురు ఉత్పత్తిలో రెండో స్థానంలో ఉన్న సౌదీ అరేబియా, మూడో స్థానంలో ఉన్న రష్యాలను వెనక్కి నెట్టి అమెరికా మొదటి స్థానానికి చేరిందని చెప్పారు. తాను అధ్యక్షుడిగా లేకుంటే ఈ స్థానం సాధ్యమయ్యేది కాదని ఆయన అన్నారు.

అంతర్జాతీయ విషయాల్లో, ఇరాన్‌కు అణు ఆయుధాలు ఎప్పటికీ అనుమతించబోమని ట్రంప్ స్పష్టం చేశారు. ఇరాన్ కూడా అణు ఆయుధం కలిగి ఉండబోమని ఇటీవలే తెలిపిందని ఆయన పేర్కొన్నారు.

దేశీయంగా రెండో రాజ్యాంగ సవరణను కాపాడుకుంటామని, దానికి ఎలాంటి ఆటంకం ఇవ్వబోమని ఆయన చెప్పారు. పిల్లలను రక్షించే చర్యలను కొనసాగిస్తామని ప్రసంగంలో అన్నారు.