మురసు తుఫానుపై సీఎం చంద్రబాబు సమీక్ష; దక్షిణ కోస్తా, రాయలసీమ జిల్లాలకు అప్రమత్తత

మురసు తుఫాను నేపథ్యంలో ఏపీ ముఖ్యమంత్రి చంద్రబాబు నాయుడు సచివాలయంలోని RTGS కేంద్రం నుంచి సమీక్ష నిర్వహించారు. జిల్లా కలెక్టర్లతో పాటు పలు శాఖల ఉన్నతాధికారులతో వీడియో కాన్ఫరెన్స్ ద్వారా పరిస్థితిని సమీక్షించారు.

తుఫాను ప్రభావం రాష్ట్రంపై తక్కువగా ఉండే అవకాశం ఉందని అధికారులు సీఎంకు తెలిపారు. అర్ణబ్ తుఫానుతో పోలిస్తే గాలులు, వర్ష తీవ్రత తక్కువగా ఉంటాయని అంచనా వేశారు. దక్షిణ కోస్తా, రాయలసీమ జిల్లాల్లో భారీ వర్షాలు కురిసే అవకాశం ఉందని ఆయన చెప్పారు. యంత్రాంగం పూర్తి స్థాయిలో అప్రమత్తంగా ఉండాలని ఆదేశించారు. అర్ణబ్ తుఫాను ప్రభావిత ప్రాంతాల్లో పరిస్థితులు దాదాపు సాధారణ స్థితికి చేరుకున్నాయని సీఎం తెలిపారు.

దక్షిణ కోస్తా, రాయలసీమ జిల్లాల్లో సుమారు 8,000 విద్యుత్ స్తంభాలపై గాలుల ప్రభావం పడే అవకాశం ఉందని అధికారులు సమీక్షలో వివరించారు. విద్యుత్ పునరుద్ధరణ కోసం చెన్నై నుంచి మరో 1,000 మంది సిబ్బంది వస్తున్నారు. వారిని నెల్లూరు, ప్రకాశం సహా వివిధ జిల్లాల్లో ఉపయోగించాలని సీఎం సూచించారు.

తుఫాను వర్షాలను ఉపయోగించుకుని చెరువులు, రిజర్వాయర్లు నింపాలని ఆయన అధికారులకు సూచించారు. గుంటూరు, బాపట్ల, పల్నాడు, ప్రకాశం, నెల్లూరు, మార్కాపురం జిల్లాల్లో వర్షపాతం లోటు ఉంది. మార్కాపురంలోని కంభం చెరువుతో పాటు మీడియం, మైనర్ ఇరిగేషన్ ట్యాంకులు నిండే అవకాశం ఉందని అధికారులు తెలిపారు.

పరివాహక ప్రాంతాల నుంచి వచ్చే వరద ప్రవాహాలను కంట్రోల్ రూమ్‌ల ద్వారా పర్యవేక్షించాలని సీఎం ఆదేశించారు. ఎస్‌డీఆర్ఎఫ్, ఎన్‌డీఆర్ఎఫ్ బృందాలను అవసరాన్ని బట్టి మోహరించారు. లోతట్టు ప్రాంతాల్లో వరద ముప్పు ఉంటే రైల్వే మార్గాలు, జాతీయ రహదారులపై రాకపోకలను నియంత్రించాలని ఆయన చెప్పారు. ప్రతి రెండు గంటలకు ఒకసారి పరిస్థితిని సమీక్షించి ప్రజలను అప్రమత్తం చేయాలని సూచించారు. తుఫాను అనంతర పునరుద్ధరణ పనులను 48 గంటల్లో పూర్తి చేయాలని ఆదేశించారు.

మురసు తుఫాను ప్రస్తుతం ఒంగోలుకు సుమారు 30 కి.మీ దూరంలో పశ్చిమ మధ్య బంగాళాఖాతంలో కేంద్రీకృతమై ఉంది. రాబోయే రెండు గంటల్లో ఇది నెల్లూరు–నరసాపురం మధ్య, ఒంగోలుకు అత్యంత సమీపంలో తీరం దాటే అవకాశం ఉందని IMD తెలిపింది.