చైనా అమెరికా ఎన్నికల డేటా చోరీ: 22 కోట్ల ఓటర్ల ఫైల్స్ దొంగతనం – ట్రంప్ వెల్లడి

వాషింగ్టన్: అమెరికా అధ్యక్షుడు డొనాల్డ్ ట్రంప్ గురువారం రాత్రి వైట్‌హౌస్ ప్రెస్ బ్రీఫింగ్‌లో చైనా అమెరికా ఎన్నికల వ్యవస్థలోకి భారీగా చొరబడిందనే రహస్య నిఘా వర్గాల సమాచారాన్ని బహిర్గతం చేశారు. 2020 ఎన్నికల సమయంలోనే చైనా 220 మిలియన్ల (22 కోట్ల) అమెరికన్ ఓటర్ల వ్యక్తిగత డేటాను దొంగిలించిందని, నకిలీ బ్యాలెట్ల తయారీకి ప్రయత్నించిందని ఆయా నివేదికలు వెల్లడిస్తున్నాయి.

చోరీ చేసిన డేటాలో ఓటర్ల పేర్లు, చిరునామాలు, ఫోన్ నంబర్లు, పార్టీ ప్రాధాన్యాలు వంటి సున్నితమైన సమాచారం ఉంది. CIA నివేదికల ప్రకారం, చైనా కమ్యూనిస్ట్ పార్టీ 2018 మధ్యలోనే అమెరికా అధ్యక్షుడిగా ట్రంప్‌ను బలహీనపరిచేందుకు దేశీయ, విదేశీ శక్తులను సమీకరించాలని ఆదేశించింది. చైనా అమెరికన్ జర్నలిస్టులకు డబ్బు చెల్లించి ట్రంప్‌పై ప్రతికూల కథనాలు రాయించిందని, పెద్ద కంపెనీల ద్వారా వ్యాపార నేతలను ప్రభావితం చేసిందని కూడా CIA రిపోర్ట్ చేసింది.

ఈ మొత్తం సమాచారాన్ని అప్పటి ఇంటెలిజెన్స్ ఏజెన్సీల్లోని కొందరు అధికారులు ఉద్దేశపూర్వకంగా దాచిపెట్టారని ట్రంప్ ఆరోపించారు. ప్రెసిడెంట్‌కు ఇచ్చే రోజువారీ బ్రీఫింగ్‌ల నుంచి చైనా జోక్యానికి సంబంధించిన అంశాలను తొలగించినట్లు ఇంటెలిజెన్స్ అనలిస్ట్‌లు రాసిన ఇమెయిళ్లను ఆయన విడుదల చేశారు. FBI లో ఒక అధికారి ‘షాడో గవర్నమెంట్’ నడుపుతున్నట్లు ఒప్పుకోవడం కూడా బయటపడింది. ఈ కవర్ అప్‌పై దర్యాప్తు చేయాలని, బాధ్యులైన అధికారులను తొలగించాలని ట్రంప్ నేషనల్ ఇంటెలిజెన్స్ డైరెక్టర్, న్యాయ శాఖ, FBI, CIA లను ఆదేశించారు.

మరోవైపు, అమెరికా ఎలక్ట్రానిక్ ఓటింగ్ యంత్రాలు సైబర్ దాడులకు అత్యంత అవకాశముందని 2020–2026 మధ్య సేకరించిన రహస్య నివేదికలు హెచ్చరిస్తున్నాయి. ఓట్ల లెక్కింపును డిజిటల్‌గా మార్చడానికి వీలైన పద్ధతులు వెనిజులా ఎన్నికల్లో వాడినట్లు CIA సమాచారం ఇచ్చింది. మిచిగాన్‌లో ఓ డెమొక్రటిక్ అనుకూల సంస్థ భారీ ఓటర్ల రిజిస్ట్రేషన్ మోసానికి పాల్పడిందని, అయినప్పటికీ బైడెన్ న్యాయ శాఖ ఆ కేసును కొట్టివేసిందని ట్రంప్ ఆరోపించారు. అదేవిధంగా, 2.78 లక్షల మంది పౌరులు కాని వ్యక్తులు అమెరికా ఓటర్ల జాబితాలో ఉన్నట్లు హోంల్యాండ్ సెక్యూరిటీ విభాగం గుర్తించింది.

ఈ దుస్థితిని సరిదిద్దేందుకు కాంగ్రెస్ తక్షణమే ‘సేవ్ అమెరికా చట్టం’ను ఆమోదించాలని ట్రంప్ పిలుపునిచ్చారు. ఇందులో ఓటరు ఫోటో ID తప్పనిసరి, పౌరసత్వ రుజువు, ఎన్నికల రోజు ఓటింగ్‌కు హాజరుకాలేని వారికి మాత్రమే మెయిల్ ద్వారా ఓటు అనుమతి వంటి నిబంధనలు ఉంటాయి. రాష్ట్రాలకు సమాచారం ఇచ్చి ఎన్నికల యంత్రాల్లోని లోపాలను సరిచేస్తామని, అర్హత లేని ఓటర్లను తొలగించే చర్యలు తీసుకుంటామని ఆయన ప్రకటించారు. NBC, ABC వంటి మీడియా ఈ ప్రసంగాన్ని ప్రసారం చేయడానికి నిరాకరించడం పట్ల ట్రంప్ తీవ్ర అసంతృప్తి వ్యక్తం చేశారు.