ట్రంప్ రహస్య పత్రాలు విడుదల: విదేశీ జోక్యం, ఓటింగ్ యంత్రాలు అసురక్షితమని ఆరోపణ

అమెరికా మాజీ అధ్యక్షుడు డొనాల్డ్ ట్రంప్ తాజాగా కీలక రహస్య పత్రాలు విడుదల చేస్తూ, అమెరికా ఎన్నికల వ్యవస్థపై విదేశీ దాడులు, ఓటింగ్ యంత్రాల భద్రత లోపాలను బహిర్గతం చేశారు. ఈ పత్రాలు 2020 జనవరి నుంచి 2026 జూన్ వరకు నిఘా సంస్థలు సేకరించిన సమాచారాన్ని కలిగి ఉన్నాయి.

చైనా, రష్యా, ఇరాన్, ఉత్తర కొరియా వంటి దేశాలు ఎన్నికల ప్రక్రియలో జోక్యం చేసుకునే సామర్థ్యం కలిగి ఉన్నాయని ఈ నివేదికలు సూచిస్తున్నాయి. ముఖ్యంగా, 2020 అధ్యక్ష ఎన్నికల సమయంలో జో బైడెన్‌కు అనుకూలంగా నకిలీ బ్యాలెట్లను తయారు చేసేందుకు చైనా ప్రభుత్వం ప్రయత్నించిందని ట్రంప్ ఆరోపించారు. అంతేకాక, చైనా కొన్ని అమెరికన్ కంపెనీల ద్వారా అమెరికా అధ్యక్షుడిపై వ్యతిరేకత రేపడానికి ప్రయత్నించిందని, విలేకరులకు డబ్బు చెల్లించి ప్రతికూల కథనాలు రాయించిందని సీఐఏ సమాచారాన్ని ట్రంప్ ఉటంకించారు.

అదే సమయంలో, 2020 ఎన్నికల సమయంలో ఎఫ్‌బీఐ అధికారులు, నిఘా సంస్థలు చైనా జోక్యానికి సంబంధించిన కీలక సమాచారాన్ని ఉద్దేశపూర్వకంగా దాచిపెట్టారని, ప్రెసిడెంట్‌కు ఇచ్చే రోజువారీ బ్రీఫింగ్‌లో ఈ విషయాలు చేర్చలేదని ట్రంప్ ఆరోపించారు. ఈ కవరప్‌లో పాల్గొన్న వారిపై క్రిమినల్ చార్జీలు నమోదు చేయాలని ఆయన డిమాండ్ చేశారు.

ఇక ఎలక్ట్రానిక్ ఓటింగ్ యంత్రాలు అత్యంత ప్రమాదకర స్థాయిలో హ్యాకింగ్‌కు గురయ్యే అవకాశం ఉందని పత్రాలు స్పష్టం చేస్తున్నాయి. వెనిజులాలోని మదురో ప్రభుత్వం డిజిటల్ ఓట్ల మార్పిడికి ఉపయోగించిన పద్ధతులు ఎలాంటి ఆడిటింగ్‌లోనూ బయటపడవని ట్రంప్ చెప్పారు.

ఇంకోవైపు, 2020 ఎన్నికల సమయంలో మిచిగాన్‌లో పెద్ద ఎత్తున ఓటర్ నమోదు మోసం జరిగిందని ఎఫ్‌బీఐ దస్త్రాలు వెల్లడిస్తున్నాయి. డెమొక్రాట్ అనుబంధ సంస్థ ఎన్నికల రిజిస్ట్రేషన్ ఫారాలను తప్పుగా నింపి, నకిలీ ఓటర్లను సృష్టించిందని, ఇందుకోసం ఆ సంస్థకు చెందిన వాలంటీర్లకు గిఫ్ట్ కార్డులు ఇచ్చినట్లు ట్రంప్ తెలిపారు. అయితే, బైడెన్ న్యాయశాఖ ఈ దర్యాప్తును నిలిపివేసిందని ఆరోపించారు.

డిపార్ట్‌మెంట్ ఆఫ్ హోంల్యాండ్ సెక్యూరిటీ నివేదిక ప్రకారం, దాదాపు 2,78,000 మంది అమెరికా పౌరసత్వం లేని వ్యక్తులు ఫెడరల్ ఎన్నికలకు నమోదు చేసుకున్నారని ట్రంప్ వెల్లడించారు. పలు డెమొక్రాట్ రాష్ట్రాలు తమ ఓటరు జాబితాలను పంచుకోకపోవడంతో అసలు సంఖ్య ఇంకా ఎక్కువేనని ఆయన చెప్పారు.

ఈ పరిస్థితుల్లో, డైరెక్టర్ ఆఫ్ నేషనల్ ఇంటెలిజెన్స్, ఎఫ్‌బీఐ, సీఐఏ, న్యాయశాఖలు పూర్తి స్థాయి దర్యాప్తు చేపట్టి, బాధ్యులపై చర్యలు తీసుకోవాలని ట్రంప్ డిమాండ్ చేశారు.