టారిఫ్ ఎగవేతలపై కఠిన చర్యలు: $100 బిలియన్ల ఆదాకు ట్రంప్ ఎగ్జిక్యూటివ్ ఆర్డర్

అమెరికా అధ్యక్షుడు డొనాల్డ్ ట్రంప్ టారిఫ్ ఎగవేతలను అరికట్టేందుకు కీలకమైన ఎగ్జిక్యూటివ్ ఆర్డర్‌పై సంతకం చేశారు. దీని ద్వారా ఏటా 100 బిలియన్ డాలర్ల వరకు ఆదా చేయవచ్చని ట్రంప్ ప్రకటించారు. కస్టమ్స్ అండ్ బోర్డర్ ప్రొటెక్షన్ (CBP) విధానాలను ఆధునీకరించి టారిఫ్ నియమాల ఉల్లంఘనలను, ఫెంటానిల్, నకిలీ ఉత్పత్తుల రాకను అడ్డుకోవాలని ఈ ఉత్తర్వు లక్ష్యంగా పెట్టుకుంది. ట్రంప్ సలహాదారు పీటర్ నవారో మాట్లాడుతూ, “మొదటి ఏడాది 15 బిలియన్ డాలర్లు, రెండో ఏడాది 25 బిలియన్ డాలర్లు ఆదా అవుతాయి. టారిఫ్ ఎగవేతల వల్ల ఏటా 80 నుంచి 100 బిలియన్ డాలర్ల నష్టాన్ని అరికట్టవచ్చు” అని వివరించారు. CBP కమిషనర్ రోడ్నీ స్కాట్ ఈ చర్యను అక్రమ వలసల నియంత్రణ మాదిరిగానే వాణిజ్య సరిహద్దును భద్రపరచడంతో పోల్చారు. “వలస సరిహద్దులో ఉపయోగించిన అమెరికా ఫస్ట్ సూత్రాన్నే ఇప్పుడు వాణిజ్యానికీ వర్తింపజేస్తున్నాం” అని ఆయన తెలిపారు. అమెరికాలోకి దిగుమతి చేసుకునే ఉత్పత్తుల వివరాలు ఖచ్చితంగా నివేదించడం, షెల్ కంపెనీల ద్వారా బాధ్యత నుంచి తప్పించుకునే వారిపై చర్య తీసుకోవడం ఈ కొత్త విధానంలో భాగంగా ఉంటుంది. గతంలో బైడెన్ హయాంలో దేశ సరిహద్దు పూర్తిగా నియంత్రణలో లేదని, ప్రస్తుతం ఫెంటానిల్ అక్రమ రవాణా 59% తగ్గిందని ట్రంప్ చెప్పారు. ఇదే కార్యక్రమంలో ఫెడరల్ వర్క్‌ఫోర్స్ సంస్కరణలపై మరో ఎగ్జిక్యూటివ్ ఆర్డర్‌పై కూడా ట్రంప్ సంతకం చేశారు. విధాన నిర్ణయాల్లో ఉన్న అధికారులను త్వరగా తొలగించేలా నిబంధనలు సడలించడం, ప్రైవేటు రంగంలో మాదిరిగా మెరిట్ ఆధారంగా ఉద్యోగులను నియమించుకునే వీలు కల్పించడం ఈ ఉత్తర్వు లక్ష్యం.