లోటు వర్షాలు, ఎల్నినోతో వరి సాగు వద్దు: మంత్రి తుమ్మల

రాష్ట్రంలో లోటు వర్షపాతం, భూగర్భజలాలు వేగంగా తగ్గిపోతున్న నేపథ్యంలో బోరుబావుల కింద వరి సాగు చేయవద్దని వ్యవసాయ శాఖ మంత్రి తుమ్మల నాగేశ్వరరావు రైతులను కోరారు. అక్కడక్కడ కురుస్తున్న వర్షాలను చూసి వరి సాగు నిర్ణయం తీసుకోవద్దని చెప్పారు. ఐఎండీ అంచనాల ప్రకారం సెప్టెంబర్ నుంచి డిసెంబర్ వరకు ఎల్నినో ప్రభావం తీవ్రమవుతుందని ఆయన తెలిపారు.

సెక్రటేరియట్‌లో ఉన్నతాధికారులతో జరిగిన సమీక్షలో మంత్రి ఈ విషయాలు వెల్లడించారు. రాష్ట్రంలోని 23 జిల్లాల్లో లోటు వర్షపాతం నమోదైందని, ఒకటి రెండు జిల్లాలు మినహా ఎక్కడా సాధారణ వర్షాలు పడలేదని అధికారులు చెప్పారు. మహారాష్ట్ర, కర్ణాటకల్లోనూ వర్షాలు తగ్గడంతో గోదావరి, కృష్ణా నదులకు భారీ వరదలు వచ్చే అవకాశం లేదన్నారు. మేజర్, మైనర్ ఇరిగేషన్ ప్రాజెక్టుల నీరు ప్రధానంగా తాగునీటి అవసరాలకే సరిపోతుందని మంత్రి తెలిపారు.

యాసంగి సీజన్ పైన ఎల్నినో ప్రభావం ఉంటుందని, దీన్ని ఎదుర్కోవడానికి జిల్లాల వారీ సూచనలతో సమగ్ర రాష్ట్రస్థాయి కార్యాచరణ ప్రణాళిక రూపొందించి ముఖ్యమంత్రికి ఇస్తామని మంత్రి చెప్పారు. ప్రస్తుత పరిస్థితుల్లో గత ఏడాదితో పోలిస్తే 23 శాతం సాగు విస్తీర్ణం తగ్గే అవకాశం ఉందని అంచనా వేశారు. రాష్ట్ర ప్రణాళిక సంఘం ఉపాధ్యక్షుడు చిన్నారెడ్డి మాట్లాడుతూ ఇప్పటివరకు 24 శాతం లోటు వర్షపాతం నమోదైందని, సాధారణ సాగుతో పోలిస్తే ఈ ఏడాది 32 లక్షల ఎకరాల్లో సాగు తగ్గొచ్చని చెప్పారు.

అధిక నీటి అవసరం ఉండే వరి, పత్తి పంటల స్థానంలో పప్పు ధాన్యాలు, చిరుధాన్యాలు, నూనె గింజలు, కూరగాయలు, ఉద్యాన పంటల సాగును ప్రోత్సహించాలని మంత్రి అధికారులను ఆదేశించారు. రంగారెడ్డి, మేడ్చల్, మహబూబ్ నగర్, భువనగిరి, నల్గొండ జిల్లాల్లో కూరగాయల సాగు విస్తరణపై రైతులకు అవగాహన కల్పించాలన్నారు. ఇప్పటికే సాగులో ఉన్న పంటలను శాస్త్రీయ పద్ధతులతో రక్షించడంపై రైతులకు శాస్త్రవేత్తలు వివరించాలని సూచించారు.

ప్రత్యామ్నాయ పంటల విత్తనాలు, ఎరువులు, డ్రిప్-స్ప్రింక్లర్ పరికరాలు ముందే సిద్ధంగా ఉంచాలని మంత్రి ఆదేశించారు. రైతు వేదికలను విత్తనాల పంపిణీ కేంద్రాలుగా వినియోగించుకోవాలన్నారు. నేషనల్ సీడ్ కార్పొరేషన్ నుంచి విత్తనాలు సేకరించి, వాటిపై 50 శాతం వరకు సబ్సిడీ కల్పించేందుకు కేంద్రంతో చర్చించాలని అధికారులకు సూచించారు. గ్రామ స్థాయిలో ఎల్నినో, నీటి లభ్యత, ప్రత్యామ్నాయ పంటలపై రైతులకు విస్తృత అవగాహన కార్యక్రమాలు నిర్వహించాలన్నారు.

ఈ ఏడాది రూ.58 వేల కోట్ల వ్యవసాయ రుణ లక్ష్యంలో ఇప్పటివరకు రూ.20 వేల కోట్లు రైతులకు అందినట్లు బ్యాంకు అధికారులు తెలిపారని మంత్రి చెప్పారు. సూక్ష్మ సేద్యానికి అదనపు రుణాలు ఇవ్వాలని బ్యాంకులను ఆయన కోరారు. ఉపాధి హామీ పథకం కింద నీటి సంరక్షణ పనులకు ప్రాధాన్యత ఇవ్వాలని పంచాయతీరాజ్ శాఖకు సూచించారు.