తుంగతుర్తి ఎమ్మెల్యే మందుల సామేల్ వ్యాఖ్యలతో కాంగ్రెస్ అంతర్గత వివాదం ప్రజాభవన్‌కు చేరింది

తుంగతుర్తి ఎమ్మెల్యే మందుల సామేల్ రాజగోపాల్ రెడ్డిపై చేసిన వ్యాఖ్యలతో కాంగ్రెస్ పార్టీలో అంతర్గత విభేదాలు మరోసారి తెరపైకి వచ్చాయి.

సామేల్ మాట్లాడుతూ, మునుగూడు ఎమ్మెల్యే రాజగోపాల్ రెడ్డి కంటే తానే ముందు కాంగ్రెస్‌లో చేరానని, తన కేడర్ రాజగోపాల్ రెడ్డి గెలుపులో పనిచేసినా ఇప్పుడు తీవ్ర అసంతృప్తితో ఉందని ఆరోపించారు. టికెట్ అధిష్టానం నుంచి వస్తుందని, రాజగోపాల్ రెడ్డి తన నియోజకవర్గంలో తనతో మాట్లాడకపోవడం రాజకీయ మర్యాదకాదని సామేలు విమర్శించారు.

అదే సమయంలో శనివారం ఉపముఖ్యమంత్రి భట్టి విక్రమార్కతో ఎస్సీ ఎమ్మెల్యేలు, ఎంపీలు సమావేశమయ్యారు. దళిత ప్రజాప్రతినిధులకు ప్రత్యేక నిధులు, కీలక పదవులు, ఇందిరమ్మ ఇళ్ల పథకంలో ప్రాధాన్యత కల్పించాలని ఈ సమావేశంలో డిమాండ్ చేశారు. తుంగతుర్తి వివాదాన్ని ఎంపీ మల్లు రవి ‘టీ కప్పులో తుఫాన్’గా అభివర్ణించారు. దీనిపై బహిరంగ వ్యాఖ్యలు చేయొద్దని సమావేశం నిర్ణయించింది.

పార్టీ వర్గాల సమాచారం ప్రకారం, తుంగతుర్తి వివాదంపై పీసీసీ వర్కింగ్ ప్రెసిడెంట్ జగ్గారెడ్డి నివేదిక తాత్కాలికంగా ఆగింది. పీసీసీ ప్రెసిడెంట్ స్థాయిలో ఒక వ్యక్తిని పంపించి పరిస్థితిని పరిశీలిస్తామని, ఆ తర్వాత తగు నిర్ణయం తీసుకుంటామని మల్లు రవి తెలిపారు.