త్వీషా శర్మ డెత్ కేసు: ఎక్స్-జడ్జి గిరిబాల కస్టడీ పొడిగింపుకు CBI దరఖాస్తు చేసే అవకాశం

త్వీషా శర్మ మృతి కేసులో అరెస్టైన ఎక్స్-జడ్జి గిరిబాల సీబీఐ కస్టడీ ఈరోజుతో ముగియనుండగా, ఆమెను మధ్యప్రదేశ్ కోర్టులో హాజరుపరిచి కస్టడీ పొడిగింపును కోరనున్నట్లు CBI వర్గాలు వెల్లడించాయి. గిరిబాలకు ముందస్తు బెయిల్ రద్దు అయిన తర్వాత CBI ఆమెను అరెస్ట్ చేసింది. గత కొద్ది రోజులుగా ఆమె CBI కస్టడీలో ఉన్నారు. కేసు దర్యాప్తులో భాగంగా, నిందితులైన గిరిబాల మరియు ఆమె కుమారుడు హస్సన్‌ను CBI నిన్న సంఘటనా స్థలంలో సీన్ రీక్రియేషన్ నిర్వహించింది. ఇంటి డాబాపై ఒక డమ్మీ బాడీతో మే 12 రాత్రి జరిగిన సంఘటనను పునర్నిర్మించారు. ఈ సమయంలో త్వీషా శరీరంపై కనిపించిన గాయాల గురించి ప్రశ్నించగా, తల్లీ కొడుకులు ఇద్దరూ మౌనంగా ఉండిపోయారని CBI అధికారులు తెలిపారు. త్వీషా శరీరంపై నీలిరంగు గాయాలు, బ్రూయిసెస్ ఉండటం రెండో పోస్టుమార్టం రిపోర్టులో నమోదైంది. బెల్ట్ మిస్టరీ వల్లే రెండో పోస్టుమార్టం నిర్వహించారు. ఈ గాయాలకు కారణమేంటని నిందితులను నిలదీసినా సమాధానం ఇవ్వలేదని CBI పేర్కొంది. నిందితుల మౌనం అనుమానాలను మరింత బలపరుస్తోంది. ఈ నేపథ్యంలో గిరిబాల కస్టడీ పొడిగింపు కీలకంగా మారింది. తదుపరి విచారణ కోసం CBI కస్టడీ అవసరమని అధికారులు భావిస్తున్నారు. ఈరోజు ఆమెను కోర్టులో హాజరుపరిచి పొడిగింపు కోసం దరఖాస్తు చేస్తామని CBI వర్గాలు చెప్పాయి. కోర్టు ఏం నిర్ణయం తీసుకుంటుందనేది ఆసక్తికరంగా మారింది.