అన్నమయ్య జిల్లా సదుంలో పోలీసులపై దాడి; ఇద్దరి నుంచి అక్రమ మద్యం, కత్తి స్వాధీనం

అన్నమయ్య జిల్లా సదుం గ్రామంలో తనిఖీలకు వెళ్లిన పోలీసులపై ఇద్దరు వ్యక్తులు దాడి చేశారు. మత్తులో ఉన్న హితేశ్వర్, రామేశ్వర్ అనే ఇద్దరు పోలీసు సిబ్బందిపై ఒక్కసారిగా దాడికి పాల్పడ్డారు. సదుం గాంధీ రోడ్డులోని సాయిబాబా దేవాలయం ఎదురుగా ఉన్న దస్తగిరి ఇంట్లో హర్యానాకు చెందిన వారు అద్దెకు ఉంటున్నారు. వీరు ఆయుధాలు కలిగి, మద్యం తాగుతూ స్థానికులను బెదిరిస్తున్నారనే సమాచారంతో చదువు ఎస్ఐ విష్ణు నారాయణ బృందం తనిఖీలకు వెళ్లింది.

ఇంట్లో హుక్కా మిషన్ గమనించి ప్రశ్నించేందుకు ప్రయత్నించగా, మత్తులో ఉన్న ఆ వ్యక్తులు పోలీసులపై దాడి చేశారు. అప్రమత్తమైన పోలీసులు వారిని అదుపులోకి తీసుకున్నారు. ఆ తర్వాత నివాసంలో సోదాలు చేయగా 10 లీటర్ల నాటుసారా, 18 మద్యం బాటిళ్లు, హుక్కా మిషన్, ఒక కత్తి స్వాధీనం చేసుకున్నారు.

ఈ ఘటనపై జిల్లా ఎస్పీ ధీరజ్ కునిబిల్లీ స్పందించారు. శాంతి భద్రతలకు విఘాతం కలిగించే వారిపై కఠిన చర్యలు తీసుకుంటామని హెచ్చరించారు. పోలీసులు ఇద్దరిని అదుపులో ఉంచి దర్యాప్తు చేస్తున్నారు.