రష్యా చమురు వ్యాపారంపై ఆర్టికల్: ఆన్‌లైన్ దాడులు ఎదుర్కొన్న US అధికారి ఆవేదన

భారత్ రష్యా నుంచి చమురు కొనుగోలు చేస్తున్న తీరుపై Financial Times లో ఆర్టికల్ రాసిన US అధికారి ఒకరు, భారతీయ నెటిజన్ల నుంచి తీవ్రమైన ఆన్‌లైన్ దాడులు ఎదుర్కొన్నారని వెల్లడించారు. ఈ వివాదం ఇప్పుడు పరిష్కారమైందని, రెండు దేశాల నేతల మధ్య సంబంధాలు సజావుగా సాగుతున్నాయని ఆయన స్పష్టం చేశారు.

ట్రంప్ ప్రభుత్వంలో పని చేస్తున్న ఈ అధికారి, లిండ్సే గ్రాహం బిల్లు ప్రతిపాదించిన భారత్‌పై 100 శాతం టారిఫ్ అంశం, అమెరికా-భారత్ వాణిజ్య చర్చలపై విలేకరుల ప్రశ్నలకు సమాధానమిస్తూ ఈ వ్యాఖ్యలు చేశారు. "ఉక్రెయిన్‌పై రష్యా దాడికి ముందు భారత్ రష్యా చమురు వ్యాపారంలో పాల్గొనలేదు. కానీ యుద్ధం తర్వాత భారత్ రష్యా చమురును ప్రాసెస్ చేసి విక్రయించడం యుద్ధ యంత్రాంగానికి సహాయపడుతోందని" నా ఆర్టికల్ లో నిజాలను రాశానని అన్నారు.

ఈ వ్యాఖ్యలు సోషల్ మీడియాలో భారీ వివాదం రేపాయి. భారతీయ యూజర్లు ఆయనపై ఆన్‌లైన్ లో నిప్పులు చెరిగారు. అయితే, ఆ సమస్య ఇప్పుడు పరిష్కారమైందని, దీనికి తన ఆర్టికల్ కూడా కారణం కావచ్చునని ఆ అధికారి వ్యాఖ్యానించారు. "మీరు ఇలా చేయకూడదు. అమెరికాలో సమస్యలను ఇలా పరిష్కరించుకోము" అని ఆయన భారతీయ నెటిజన్లను ఉద్దేశించి చెప్పారు.

అమెరికా అధ్యక్షుడు ట్రంప్, భారత ప్రధాని మోదీల మధ్య అద్భుతమైన సంబంధాలు ఉన్నాయని, వాణిజ్య ఒప్పందం వివరాలు వారే నిర్ణయిస్తారని, దానిపై తాను మాట్లాడదలుచుకోలేదని అధికారి తెలిపారు. లిండ్సే గ్రాహం ప్రతిపాదించిన టారిఫ్ బిల్లుపై చర్చలు కొనసాగుతున్నాయి. ఈ నేపథ్యంలో భారత్-అమెరికా వాణిజ్య ఒప్పందం భవిష్యత్తుపై ఆసక్తి నెలకొంది.