యూఎస్ విద్యార్థి వీసా నిబంధనల్లో కీలక మార్పులు: ఎఫ్, జే వీసాలకు గరిష్టంగా నాలుగేళ్లు

వాషింగ్టన్: అమెరికాలో విద్యార్థి వీసా నిబంధనలను కఠినతరం చేయాలని ట్రంప్ ప్రభుత్వం నూతన ప్రతిపాదనలు చేసింది. ప్రస్తుతం ఉన్న ‘డ్యూరేషన్ ఆఫ్ స్టేటస్’ (దేశంలో చదువు/పని ఉన్నన్నాళ్లు వీసా చెల్లుబాటు) విధానాన్ని రద్దు చేసి, స్థిర వీసా వ్యవధిని ప్రవేశపెట్టాలని ఈ ప్రతిపాదనలో పేర్కొంది. ఈ నిబంధనలు ఆమోదం పొందితే, లక్షలాది మంది భారతీయ విద్యార్థులతో సహా అంతర్జాతీయ విద్యార్థులు, ఎక్స్ఛేంజ్ విజిటర్లు, విదేశీ జర్నలిస్టులపై ప్రభావం పడనుంది.

ప్రతిపాదిత నిబంధనల ప్రకారం.. ఎఫ్ (విద్యార్థి) వీసాపై వచ్చే వారికి, జే (ఎక్స్ఛేంజ్ విజిటర్) వీసాపై వచ్చే వారికి గరిష్టంగా నాలుగేళ్లకు మాత్రమే వీసా జారీ చేస్తారు. ఐ (జర్నలిస్ట్) వీసాపై వచ్చే విదేశీ జర్నలిస్టులకు 240 రోజులు మాత్రమే; చైనా జర్నలిస్టులకు ఈ పరిమితి 90 రోజులు. ఇప్పటికే వీసాపై ఉన్న వారు, ఏదైనా స్కూల్ మారాలన్నా, కోర్సు మారాలన్నా తప్పనిసరిగా అనుమతి తీసుకోవాలి. చదువు పూర్తయిన తర్వాత అమెరికాలో ఉండేందుకు ఇచ్చే గ్రేస్ పీరియడ్‌ను 60 రోజుల నుంచి కేవలం 30 రోజులకు తగ్గించారు.

అమెరికాలోని భారతీయ విద్యార్థుల సంఖ్య 2 లక్షలు దాటింది. వీరిలో చాలా మంది ఎఫ్1 వీసాలపై ఉన్నారు. ఈ నిబంధనల వల్ల వీసా దుర్వినియోగాన్ని నియంత్రించి, పర్యవేక్షణను మెరుగుపరచవచ్చని అమెరికా ప్రభుత్వం వాదిస్తోంది. అయితే, విమర్శకులు మాత్రం ఇది విద్యార్థులు, పరిశోధకులు, జర్నలిస్టులకు అనిశ్చితిని సృష్టిస్తుందని, ఉన్నత విద్య కోసం అమెరికా ఆకర్షణ తగ్గుతుందని హెచ్చరిస్తున్నారు.

ఈ ప్రతిపాదనలు ఆమోదం పొందితే, త్వరలోనే అమల్లోకి వస్తాయని అధికారులు తెలిపారు. అమెరికా విద్యావ్యవస్థపై వచ్చే ఈ మార్పుల ప్రభావాన్ని నిపుణులు నిశితంగా గమనిస్తున్నారు.