అమెరికా గ్రీన్ కార్డ్ బిల్లు: ఏడేళ్ల నివాసం ఉంటే చాలు, భారతీయ హెచ్‌1బీ ఉద్యోగులకు భారీ ఊరట

అమెరికాలో దీర్ఘకాలంగా నివసిస్తున్న వలసదారులకు శాశ్వత నివాస హోదా (గ్రీన్ కార్డ్) పొందేందుకు కొత్త మార్గాన్ని కల్పించే బిల్లును కాలిఫోర్నియా సెనెటర్ అలెక్స్ పడిల్లా తిరిగి ప్రవేశపెట్టారు. జులై 27న ఆయన ‘రెన్యూయింగ్ ఇమ్మిగ్రేషన్ ప్రొవిజన్స్ ఆఫ్ ది ఇమ్మిగ్రేషన్ యాక్ట్ ఆఫ్ 1929’ బిల్లును సెనేట్‌లో దాఖలు చేశారు. ఈ బిల్లు చట్టమైతే, దరఖాస్తుకు ముందు కనీసం ఏడేళ్లపాటు నిరంతరంగా అమెరికాలో నివసించిన, నేర చరిత్ర లేని వలసదారులకు నేరుగా గ్రీన్ కార్డ్ దరఖాస్తు చేసుకునే అవకాశం లభిస్తుంది. ప్రస్తుతం అమల్లో ఉన్న ఇమ్మిగ్రేషన్ అండ్ నేషనాలిటీ చట్టం (INA) సెక్షన్ 249 కింద, 1972 జనవరి 1 లోపు అమెరికాలో ప్రవేశించిన వారికి మాత్రమే రిజిస్ట్రీ ద్వారా గ్రీన్ కార్డ్ కోసం దరఖాస్తు చేసుకునే వీలుంది. పడిల్లా బిల్లు ఈ గడువును తొలగించి, రోలింగ్ 7 ఏళ్ల నివాస నిబంధనను ప్రతిపాదిస్తోంది.

పడిల్లా కార్యాలయం అంచనా ప్రకారం, దాదాపు 80 లక్షల మంది వలసదారులు ఈ బిల్లు ద్వారా గ్రీన్ కార్డుకు అర్హత సాధించవచ్చు. వీరిలో డ్రీమర్స్, తాత్కాలిక రక్షిత హోదా ఉన్నవారు, దీర్ఘకాల వీసా హోల్డర్ల పిల్లలు, ముఖ్యమైన సేవా రంగాల్లో పనిచేస్తున్న కార్మికులు, అలాగే H-1B వంటి ఉద్యోగ వీసాలపై ఉన్న నైపుణ్యం కలిగిన నిపుణులు ఉన్నారు. భారతీయులకు ఇది ఎందుకు కీలకమంటే, ప్రతి సంవత్సరం జారీ చేసే 85 వేల H-1B వీసాల్లో దాదాపు 70 శాతం భారతీయులకే లభిస్తాయి. అయినా దేశాల వారీగా ఉద్యోగ ఆధారిత గ్రీన్ కార్డులపై ఉన్న పరిమితి (ప్రతి దేశానికి 7%) కారణంగా, దాదాపు 10 లక్షల మంది భారతీయులు దశాబ్దాల తరబడి గ్రీన్ కార్డ్ కోసం ఎదురుచూస్తున్నారు. పడిల్లా ప్రతిపాదన వీరికి ప్రత్యామ్నాయ మార్గాన్ని చూపిస్తుంది.

అమెరికాలో చదువుకుంటున్న భారతీయ విద్యార్థుల భవిష్యత్తుకు కూడా ఈ బిల్లు ఊరట కలిగించే అవకాశం ఉంది. ఏటా వేలాదిగా అమెరికన్ యూనివర్సిటీల నుండి పట్టా పొందిన విద్యార్థులు స్టూడెంట్ వీసా నుండి ఆప్షనల్ ప్రాక్టికల్ ట్రైనింగ్ (OPT), ఆపై H-1B వీసాకు మారతారు. నేరుగా గ్రీన్ కార్డు పొందే అవకాశం ఉంటే, ఈ ప్రయాణం చాలా వేగవంతం అవుతుందని ఇమ్మిగ్రేషన్ నిపుణులు అంటున్నారు. అయితే, బిల్లు కాంగ్రెస్‌లో ఆమోదం పొందడం అంత సులువు కాదు. రిపబ్లికన్లు ఇమ్మిగ్రేషన్ విషయంలో కఠిన విధానాలను సమర్ధిస్తున్నారు. ఏప్రిల్‌లో కాంగ్రెస్‌మెన్ అలీ క్రేన్ ‘ఎండ్ H-1B వీసా అబ్యూజ్ యాక్ట్ 2026’ బిల్లును ప్రవేశపెట్టగా, మరో రిపబ్లికన్ నేత గ్రెగ్ స్ట్యూబీ ‘ఎక్సైల్ యాక్ట్’ ద్వారా 2027 ఆర్థిక సంవత్సరం నుండి కొత్త H-1B వీసాలను పూర్తిగా రద్దు చేయాలని ప్రతిపాదించారు. దీంతో పడిల్లా బిల్లుకు సెనేట్‌లో తీవ్ర వ్యతిరేకత ఎదురయ్యే అవకాశం ఉంది. ప్రస్తుతానికిది కేవలం ప్రతిపాదన మాత్రమే. చట్టంగా మారితే, లక్షలాది భారతీయ అమెరికన్లు గ్రీన్ కార్డు పొందేందుకు ఇదొక చారిత్రాత్మక అవకాశం కావచ్చు.