కాళేశ్వరం బ్యారేజీల భవిష్యత్తుపై కేంద్రానికి వెంటనే లేఖ రాయాలని మంత్రి ఉత్తమ్ ఆదేశం

తెలంగాణ రాష్ట్ర నీటిపారుదల శాఖ మంత్రి ఉత్తమ్ కుమార్ రెడ్డి కాళేశ్వరం బ్యారేజీల భవిష్యత్తు నిర్వహణపై కేంద్రానికి వెంటనే లేఖ రాయాలని అధికారులను ఆదేశించారు.

జలశక్తి మంత్రిత్వ శాఖ జాతీయ డ్యాం భద్రతా అథారిటీ (NDSA) నుంచి స్పష్టమైన సాంకేతిక మార్గదర్శకాలు కోరాలని సూచించారు. మేడిగడ్డ, అన్నారం, సుందెళ్ల బ్యారేజీల భవిష్యత్తు నిర్వహణపై సచివాలయంలో సమీక్ష నిర్వహించారు. NDSA సూచించిన విధంగానే రాష్ట్ర ప్రభుత్వం మూడు బ్యారేజీలను నీటి నిల్వ చేయకుండా ఫ్రీ ఫ్లో విధానంలో నిర్వహిస్తుందని మంత్రి స్పష్టం చేశారు.

భవిష్యత్తులో నీటి నిల్వ, పంపింగ్ కార్యకలాపాలు ప్రారంభించాలా వద్దా అనే నిర్ణయం రాజకీయ ఒత్తిళ్లు లేదా బాహ్య పరిస్థితుల ఆధారంగా కాకుండా, అర్హత కలిగిన సాంకేతిక సంస్థల లిఖితపూర్వక సిఫారసుల ప్రకారమే తీసుకుంటామని ఆయన తేల్చి చెప్పారు.

మేడిగడ్డ బ్యారేజీ పునరుద్ధరణ కాన్సెప్ట్ డిజైన్ ఆగస్టు నెలాఖరుకు, ప్రాథమిక వ్యయ అంచనాలు సెప్టెంబర్ నాటికి సిద్ధమవుతాయని అధికారులు తెలిపారు. ఈ సమీక్షలో పాలమూరు రంగారెడ్డి ఎత్తిపోతల పథకం పురోగతిని కూడా మంత్రి పరిశీలించారు.