తుని అంగన్వాడీ కేంద్రాలు, రేషన్‌షాపుల్లో అక్రమాలు: ఫుడ్ కమిషన్ చైర్మన్ వీరప్రతాప్ రెడ్డి హెచ్చరిక

ఏపీ ఫుడ్ కమిషన్ చైర్మన్ వీరప్రతాప్ రెడ్డి కాకినాడ జిల్లా తుని పట్టణంలో ఇటీవల ఆకస్మిక తనిఖీలు నిర్వహించారు. అంగన్వాడీ కేంద్రాలు, రేషన్ షాపులు, పాఠశాలలు, గురుకులాలను ఆయన తనిఖీ చేశారు.

అంగన్వాడీ కేంద్రాల్లో పిల్లలు హాజరుకాకపోయినా హాజరు పూర్తి చేసినట్లు నమోదు చేశారు. స్టాక్ బుక్ సక్రమంగా నిర్వహించడం లేదు. ఈ నేపథ్యంలో ఇద్దరు అంగన్వాడీ వర్కర్లను టెర్మినేట్ చేయాలని చైర్మన్ ఆదేశించారు.

రేషన్ షాపుల్లో బయోమెట్రిక్ వినియోగించకుండా సరుకులు పంపిణీ చేస్తున్నట్లు గుర్తించారు. నిబంధనలు ఉల్లంఘించే డీలర్ల పై సుమోటోగా కేసులు నమోదు చేసి కోర్టుకు పంపుతామని హెచ్చరించారు. అంబేద్కర్ గురుకులం, మహాత్మ జ్యోతిబా పూలే గురుకులం, AP రెసిడెన్షియల్ పాఠశాలలను కూడా పరిశీలించారు.

చైర్మన్ వీరప్రతాప్ రెడ్డి మాట్లాడుతూ, అక్రమాలు కనిపిస్తే ప్రజలు వీడియో తీసి ఫుడ్ కమిషన్ వాట్సప్ నెంబర్‌కు పంపాలని సూచించారు. నిబంధనలు ఉల్లంఘించే వారిపై కఠిన చర్యలు తీసుకుంటామని హెచ్చరించారు. ఇటువంటి ఆకస్మిక విజిట్లు కొనసాగుతాయని చైర్మన్ స్పష్టం చేశారు.