తెలంగాణ, ఏపీలో కూరగాయల ధరలు భారీగా పెరిగాయి

తెలంగాణ, ఆంధ్రప్రదేశ్ రాష్ట్రాల్లో కూరగాయల ధరలు ఒక్కసారిగా పెరిగాయి. చాలా రకాల కూరగాయలు కిలో ₹50 పైనే పలుకుతున్నాయి. క్యాప్సికం కిలో ₹120, చిక్కుడుకాయలు ₹100, క్యారెట్ ₹80 వరకు చేరాయి. బీట్రూట్, కంద, పెండలం, పచ్చిమిర్చి ఒక్కో కిలో ₹60 ఉంది. బజ్జీకాయలు ₹100 వరకు ఉన్నాయి.

టమాటా, వంకాయ, క్యాబేజీ, దోస, బెండ, దొండకాయలు ₹40 నుంచి ₹50 మధ్యలో లభిస్తున్నాయి. బంగాళదుంప ₹30-₹40గా ఉంది. అయితే ఆకుకూరలు కట్ట ₹10, మునగకాయ ₹10-₹15గా ఉన్నాయి. అల్లం, వెల్లుల్లి ధరలు గత నెలతో పోలిస్తే బాగా పెరిగాయి. ప్రస్తుతం అల్లం కిలో ₹220, వెల్లుల్లి ₹200 పలుకుతోంది. గత నెలలో ఇవి ₹140-₹150గా ఉండేవి.

రైతు బజార్లలో మాత్రం కిలోకి ₹10 నుంచి ₹20 వరకు తక్కువగా ఉన్నాయి. ఉదాహరణకు కడప రైతు బజార్లో టమాటా ధర రెండు రోజుల క్రితం ₹35-₹40 ఉండగా, ఇప్పుడు ₹20కి పడిపోయింది. క్యారెట్, క్యాప్సికమ్ వంటివి ₹40-₹45 పరిధిలో ఉన్నాయి. అయితే పట్టణాల్లో మాత్రమే రైతు బజార్లు ఉండటం వల్ల మండల, గ్రామీణ ప్రాంతాల ప్రజలు రీటెయిల్ మార్కెట్లపైనే ఆధారపడాల్సి వస్తోంది. కొన్ని రిటైల్ దుకాణాలు కిలోకి ₹20 అదనంగా వసూలు చేస్తున్నాయని స్థానికులు చెబుతున్నారు. దీంతో మధ్యతరగతి కుటుంబాల నిత్యావసర ఖర్చులు పెరిగిపోతున్నాయి.