తొలి US రాష్ట్రంగా వర్మాంట్‌లో పారాక్వాట్ గడ్డిమందు నిషేధం; తెలంగాణలో ఇప్పటికే అమలు

అమెరికాలోని వర్మాంట్ రాష్ట్రం పారాక్వాట్ గడ్డిమందును నిషేధించింది. ఈ చర్యతో యూఎస్‌లో ఈ రసాయన హెర్బిసైడ్‌పై నిషేధం విధించిన తొలి రాష్ట్రంగా వర్మాంట్ అవతరించింది.

నరాల సంబంధిత బలహీనతలతో పాటు ఇతర ఆరోగ్య ప్రమాదాలు ఉండటంతో ఈ నిర్ణయం తీసుకున్నట్లు వర్మాంట్ అధికారులు తెలిపారు. గడ్డి నియంత్రణ ఖర్చులు పెరుగుతాయని స్థానిక రైతులు ఆందోళన వ్యక్తం చేస్తున్నప్పటికీ, ప్రాణాపాయాన్ని పరిగణనలోకి తీసుకునే ప్రత్యామ్నాయ మార్గాలు అనుసరించాలని వర్మాంట్ ప్రభుత్వం స్పష్టం చేసింది.

ఇప్పటికే చైనా సహా 70కి పైగా దేశాలు పారాక్వాట్ నిషేధం విధించాయి. భారత్‌లో పలు స్వచ్ఛంద సంస్థలు ఈ గడ్డిమందు బ్యాన్ కోసం ప్రచారం నిర్వహిస్తున్నాయి. రాష్ట్రాల స్థాయిలో తెలంగాణ ప్రభుత్వం రెండు నెలల క్రితమే పారాక్వాట్ ను నిషేధించింది. పర్యావరణ పరిరక్షణ, ప్రజారోగ్యం దృష్ట్యా ఈ నిర్ణయం తీసుకున్నట్లు ప్రభుత్వం వెల్లడించింది.

పారాక్వాట్ అత్యంత విషపూరిత రసాయనమని, స్వల్ప పరిమాణంలో శరీరంలోకి ప్రవేశించినా తీవ్ర అనారోగ్యం కలిగించే ప్రమాదం ఉందని నిపుణులు హెచ్చరిస్తున్నారు. ప్రపంచ దేశాలు ఈ ఆరోగ్య హాని నుంచి తమ ప్రజలను కాపాడేందుకు దశలవారీగా నిషేధ దిశగా అడుగులు వేస్తున్నాయి.