విశాఖ టెకీ రాధా గాయత్రి మృతి కేసులో కొత్త మలుపు: భర్త శ్రీచరణ్ స్పందన

విశాఖపట్నానికి చెందిన టెకీ రాధా గాయత్రి అనుమానాస్పద మృతి కేసులో భర్త శ్రీచరణ్ తాజాగా స్పందించారు. తనపై అత్తమామలు చేస్తున్న ఆరోపణలను ఆయన ఖండించారు.

తాము ప్రేమ వివాహం చేసుకున్నామని, మస్సూరీ హోటల్ ప్యాకేజీలో భాగంగా మద్యం అందించారని, ఇద్దరూ కలిసి సేవించామని శ్రీచరణ్ తెలిపారు. పోస్ట్మార్టం నివేదిక వచ్చాకే నిజాలు తెలుస్తాయని, తనకు ఈ మరణంతో సంబంధం లేదని అన్నారు.

మరోవైపు, గాయత్రి తల్లిదండ్రులు సుధాకర్, సత్యవతి శ్రీచరణే ప్రణాళికప్రకారం హత్య చేశారని ఆరోపిస్తున్నారు. కుమార్తెకు బీపీ, షుగర్, గుండె జబ్బు వంటివి లేవని, బ్రెయిన్ స్ట్రోక్తో మరణించడం అసాధ్యమని వారు అంటున్నారు. చనిపోయే సమయంలో తల రక్తపు మడుగులో ఉందని, దీనికి బలమైన గాయం కారణమని అనుమానిస్తున్నారు.

రెండు రోజుల క్రితం పోలీస్ కమిషనరేట్లో ఫిర్యాదు చేసిన తల్లిదండ్రులు, ఈ ఘటనపై సమగ్ర దర్యాప్తు చేయాలని కోరారు. మృతదేహానికి పోస్ట్మార్టం పూర్తయింది, రిపోర్ట్ కోసం ఎదురుచూస్తున్నట్లు సమాచారం. పోస్ట్మార్టం నివేదిక ఆధారంగా కేసులో కీలక వివరాలు వెల్లడయ్యే అవకాశం ఉంది.