కొమరంభీం ఆశ్రమ పాఠశాలలో లేట్ ఫీజు వసూలు; తల్లిదండ్రులు నిరసన

కొమరంభీం ఆసిఫాబాద్‌ జిల్లా బెంచూర్‌లోని గిరిజన బాలికల ఆశ్రమ పాఠశాలలో వార్డెన్ శ్రీనివాస్ విద్యార్థినుల నుంచి జరిమానాలు వసూలు చేశారని తల్లిదండ్రులు ఆరోపిస్తున్నారు.

వేసవి సెలవుల అనంతరం పాఠశాలకు ఆలస్యంగా వచ్చినందుకు గాను ప్రతి విద్యార్థినికీ రూ.200 నుంచి రూ.1,000 వరకు ఫైన్ విధించారని, లేకపోతే స్కూల్‌లో చేర్చుకోమని వార్డెన్ హెచ్చరించారని వారు తెలిపారు.

తల్లిదండ్రులు వార్డెన్‌ను నిలదీయగా, వారి మధ్య వాగ్వాదం చోటు చేసుకుంది. విద్యార్థులను సకాలంలో పంపించేలా చేయడానికే జరిమానా వసూలు చేస్తున్నానని వార్డెన్ చెప్పినట్లు సమాచారం.

అయితే, తల్లిదండ్రులు మాత్రం వార్డెన్ తన స్వప్రయోజనాల కోసమే డబ్బులు వసూలు చేస్తున్నారని, తమను ప్రశ్నించినందుకు అనుచిత వ్యాఖ్యలు చేశారని ఆరోపిస్తున్నారు. వార్డెన్ శ్రీనివాస్‌పై అధికారులు చర్యలు తీసుకోవాలని వారు డిమాండ్ చేస్తున్నారు.